Storia de l'Etiopia

Da Wikipedia, l'ençiclopedia libara.
Va a: navigasion, serca
Mapa de l'Etiopia

La Storia dell’Etiopia la va ndrio de tanti secoli, co na documentasion scrita tra le pi vecie del mondo. Ma se pol andar ndrio fin a i primi omeni, che da l’Etiopia i sa disperso en tel mondo.


Preistoria[canbia | canbia sorxente]

En tel Museo Naxional de Adis Abeba ghe no scheletro de na dona ciamada Lucy. Se trata de lo scheletro pi vecio mai catà da i studiosi de on esare umano. Lucy l’è stà trovà da dei antropaleologi ne laregion de l’Afar. El nome se deve a la canson che i studiosi scoltava a la radio (Lucy in the sky with diamonds) al momento del ricatamento. En tel Afar, i studiosi gha catà altri sceletri de ominidi e de i primi omeni, se pensa che l’esare umana se sia svilupà propio en stà zona.

Punt[canbia | canbia sorxente]

Le rovine del tempio de Yeha, Tigray, Etiopia.

No xe sempre facile tradur i veci testi che parla de l’Etiopia. Etiopia xe on nome Greco che vol dir ‘la tera da le face brusà’. Sto nome xe stà usa solo dal III secolo a.C. in poi, e no sempre se riferise a l’Etiopia de ancò. I egisiani parla de la tera de Punt e la tera de Yam a sud de la Nubia. Se sa che fin dal 3000 a.C. ghera conesioni comerciali tra sti teritori e l’Egito. El nome Kush, che se cata anca ne la Bibia, se riferise a olte a l’Etiopia, e a olte a la Nubia. La strada carovaniera la seguia el corso del fiume Nilo, fin su i altipiani etiopici. La prima spedision via mare la xe stà fata da la faraona Hatsheput en tel 1495 a.C. e la xe registrà nei geroglifici de Deir el-Bahri.

I primi testi etiopici che se conose (500 a.C.) parla de el regno D’mt, con la cavevdal a Yeha. Se sa che sto regno l’è nato nel XI secolo a.C. e che probabilmente xera stà influensà da l’arivo de zente da lo Yemen (i sabeani, che gavea on regno in Yemen). Sta cultura xera sofisticà. La zente usava canali d’irigasion, l’aratro, e armi de fero, e savea scrivar, utilizando on alfabeto de origine semitica. En sto periodo, ghe stà n’influenza ebraica. No ghe testi precisi che parmete de ricostruir la storia esata de sta influenza, ma el tempio de Yeha el riproduse el tempio de Gerusaleme, e sul lago Tana, se cata ancora ogi de i altari de piera simili a quei descriti en te la Bibia. El xe posibile che amrcanti ebrei xe rivà qi da lo Yemen, che xe sempre stà en contato co Israele. Da sto primo regno D’mt se sà svilupà el regno de Aksum, anca se no ghe testi che spiega sto pasagio.

Aksum[canbia | canbia sorxente]

La stele del Re Ezana a Aksum.

EL regno de Aksum, el nome vien da quelo de la cavedal su i altipiani del nord de l’Etiopia, xe el primo regno conosù grasie a i testi che se conserva. Nel I secolo a.C., i re de Aksum xe stà boni de scominsiar l’unificasion de i altipiani etiopici. De sto periodo xe un testo persin che indica Roma, la Cina, la Persia e Aksum come le grandi potense del tempo. El regno de Aksum controlava le trate comerciali che da la costa oriental de l’Africa rivava al mediteraneo. Oro, avorio, mira, animali esotici, pepe e altra marcansia pasava da l’Etiopia che fasea pagar el dasio.

N’altro fator de uificasion xe stà la religion. Frumentius e on so companio xera cristiani siriani. Rivà en Etiopia nel 330 d.C. circa, i xe stà boni de convertir el re Ezana. Da le monete conià da stò re se vede che a l’inisio del so regno el credea en divinità locali, par poi pasare a la fede en Cristo. Ezana xe anca el re che gha conquistà el regno de Meroe, en Nubia, e almanco parte del regno sabeano de el Yemen. El cristianesimo xe stà acolto da i nobili. Nel V secolo, l’arivo de nove monaci gha dato vita a l’evangelizasion de la popolasion e a la forte influensa che el monachesimo gavù – e ancora el gha – su la popolasion etiopica.

En tel 523, el re yemenita Dhu Nuwas, ebreo, gha scominsià la persecusion contro i cristiani che vivea en Yemen. Quando el gha atacà i soldati etiopici a Zafar – su la costa yemenita – el imperator Giustino I gha domandà al re Kaleb de Axum de tacar guera contro Nuwas. En tel 525, le trupe etiopiche gha invaso lo Yemen, deposto el re e meso un vice-re al so posto. La vitoria contro el re yemenita xe stà el pico del regno de Axum, che da alora gha scominsià a perdar potenza. No se sa ben come sto regno xe finio parchè manca testi scriti. Se sa solo che Aksum gha perso la forza de coesion che gavea su la popolasion etiopica e che el paexe xe entrà en on tempo de division e lota interna.

Dopo secoli de incertese, Mara Takla Haymanot gha fondà la dinastia Zagwe en tel 1100 circa. El re pi importante de sta dinastia xe stà Gebre Mesqel Lalibela, durante el so regno le ciexe de Lalibela xe stà scavade ne la rocia, come se pol vedar ancora ancò, creando on capolavoro de architetura. Nel 1270, l’ultimo re Zagwe l’è stà deposto da Yekuno Amlak che disea de desendar da i re de Aksum, e quindi de la dinastia de ogine salomonica, come voria la legenda. Durante sto regno, le tre procince del Tigray, Amhara e Shewa xera guidà da regenti, e el re se fasea ciamar nagusa nagast, re de i re, emperator de Etiopia.

I portoghexi[canbia | canbia sorxente]

Durante el medio evo en Eoropa ghera na legenda. Se parlava de on regno cristiano potente a sud del Sahara, el re se ciamava Zuan Prester. I portoghexi, come altre potense eoropea, gha mandà na spedision a caracr sto regno. El portoghexe Pero da Covilhã l’è rivà em Etiopia en tel 1490 e gha pensà che quelo fuse el regno de la legenda. El re gha domandà a i portoghexi de iutarlo contro i musulmani. El portogal gha mandà na flota nel 1520 e de i preti. Na seconda flota xe rivà nel 1541 e 400 soldai portoghexi gha iutà i soldai etiopici ne la guera contro i invasori islamici. Dopo on par de vitorie, i portoghexi xe stà vinti ne la batalia de Wofla. La vitoria de i etiopici la rivò en tel 1543 co la batalia de Wayna Daga. El capo de i portoghexi gha domandà al imperatore de profesar l’obedienza a la ciexa de Roma (i etiopici segue on rito orientale che non el xe en comunione co i catolice de Roma), ma l’imperator gha rifiutà. I portoghexi gha alora lasà el paexe. I preti gesuiti che gavea seguì la spedision xe rimasti nel paexe fina al 1633, co i xe stà espulsi.


Zemene Mesafint[canbia | canbia sorxente]

Anca se el imperator gavea vinto la guera contro i musulmani, questi xera ancora en control de na parte del teritorio. El teritorio xera anca diviso tra signori feudatari, che no sempre scoltava la casa reale. Co l’asasinio de Iyasu I scominzia la Zemene Mesafint, el tempo de i principi. I sioroti locali, che no volea perdar el loro poder, gha scominsià a metarse d’acordo par elezar on re pitosto che n’altro, a copar quei che no ghe andava. A la fine, i gha selto uno de lori, Yostos I, come re, metendo da parte i pretendenti al trono de origine salomonica. En sto periodo, l’Etiopia xe rimasta isolà da el resto del mondo. Anca el poder economico del regno el sa spento. I imperatori vivea speso ne le macerie de i palazi reali de na olta, senza verghe schei par metare a posto la cavedal. Pochi eoropei xe stà boni de rivar fin en Etiopia en sto periodo che durarà fin a la metà del XIX secolo.


Età moderna[canbia | canbia sorxente]

Soto i imperatori Tewodros II (1855 - 1868), Yohannes IV(1872 - 1889), e Menelik II (1889 - 1913), l’Etiopia gha scominsià a vegnar for a dal so medioevo par entrar de novo en contato co paexi estari. Tewodros gha riorganizà l’aministrasion de el regno, contro el parer de i so feudatari. El raporto co le potense eoropee xe stà negativo. Co la regina Vitoria no gha risposto a na so letara, Tewodros gha fato metar en prison i inglexi che vivea en Etiopia. I inglexi gha mandà na spedision par salvarli, e el re – co gha savesto che gavea perso – el sa copà. En tel marso 1870, na compagnia comerciale italiana gha comprà el porto de Asab nel sud de l’Eritrea da un sultan locale. Dopo verghe comprà altra tera nel 1879 e 1880, la compagnia gha vendù tuto al governo italian nel 1882. En tel 1888, 20 000 soldadi italiani xe rivà a Asab. Dopo na negosiaxion co i etioipici, 5 000 soldadi xe rimasti a Asab.

El imperator Yohannes IV gha dovù far combatare co i dervishi. En tel 1889, a la batalia de Gallabat, i etiopici gha vinto, ma el imperator xe stà colpio da na palotola e el xe morto (9 marso). Sahle Maryam, sior de Shawa, el sà proclamà emperator co el nome de Menelik II, e i sioroti locali xe stà d’acordo. Menelik gha firmà el tratato de Wuchale co i italiani (2 magio, 1889) dandoghe l’Eritrea a i italiani en cambio del 30 000 fuzili, palotole e canoni. I italiani gha subito dito che el tratato ghe dava a lori el protetorato su tuta l’Etiopia, anca se el testo no dixe niente de sto genere. El problema se gha risolto co la batalia de Adua co i italiani gha perso contro i etiopici (1 marso 1896). En tel 1894, Menelik gha dato el parmeso a i francexi de costruir la ferovia da Gibuti a Adis Abeba. A la morte de Menelik, so neodo Lij Iyassu l’è saliò al trono par esar deposto nel 1916. Zaudito, la fiola de Menelik, l’è salia al trono e so cusin Ras Tafari Makonnen nomià regente. En tel 1930, a la morte de Zaudito, Ras Tafari l’è diventà imperatore co el nome de Haile Selassie I.


Colonia italiana[canbia | canbia sorxente]

El regno de Haile Selassie xe stà interoto da l’invasion italiana del 1935. I italiani gha costruio tute le infrastruture che mancaa: scole, strade, ponti. Ma el controlo italiano xe durà poco. Co la seconda guera mondiale, i italiani gha perso l’Etiopia e l’Eritrea, e l’Etiopia gha anexo l’Eritrea al regno. L’Influenza italiana en Etiopia no la xe stà granda, e se pol dir che l’Etiopia no la xe stà veramente colonixà.

Dopo la guera, Haile Selassie gha laorà par modernisar el paexe, ma no gha mai tentà de cambiar radicalmente el sistema feudatario. En tel 1963, l’Etiopia xe stà tra i fondatori de l’Organizasion de l’Unità Africana, che gha sede a Adis Abeba.


DERG[canbia | canbia sorxente]

Mentre el paexe patia par la carestia, Haile Selassie stava el so palazo ne la cavedal sensa incorserse de la situasion de la zente. Nel febraro 1974, i militari gha fato on colpo de stato e gha deposto el imperator. Eò 12 setembre 1974, i militari gha costituio el DERG, on comitato che dovea governar el paexe. El imperatore xe morto el 22 agosto 1975, l’acusa xe che el xe stà stofegà da i militari. El colonelo Mengistu Haile Mariam xe divenà el presidente de l’Etiopia e el gha subito ordinà l’asasinio de i so coleghi pi forti e quelo de migliara de opositori. Soto Mengistu, el governo gha nasionalizà tute le tere. En tel 1977, la Somalia gha invaso l’Ogaden, na region de l’Etiopia co l amajoria d ei bitanti de origine somala. Dopo verghe vinto la guera, el governo etiopico no gha iudà la zente de l’Ogaden a ricostruir la so region. Ancora ancò sta region xe la pi povera del paexe. El primo de febraro del 1987, la popolasion la xe stà ciamà a le urne par aprovar la costitusion del paexe. L’Etiopia la diventava così na Republica Democratica, e Mengistu el so primo presidente.

La represion de la rivolta del Tigray e la guera de autodeterminasion de l’Eritrea gha disanguà le case del paexe. En pi, na serie de carestia e la morte de pi de on milion de persone par la fame, gha portà el governo al colaso. En tel magio del 1991, le forse de oposision xe entrà a Adis Abeba e el ditator xe scapà en Zimbabwe. En tel 2006, co on proceso legale, Mengistu l’è stà condanà par genocidio. Mengisto l’è ancora nascosto en Zimbabwe.

I ultimi ani[canbia | canbia sorxente]

Dopo la caduta del DERG, l’Etiopia xe stà governà da on comitato de transision. Le prime elesioni democratice xe stà en tel 1995 e Meles Zenawi xe diventà el primo Primo Ministro eleto democraticamente, Negasso Gidade el primo Presidente. Le seconde elesioni xe stà nel 2000, co Meles rieleto e Girma Wolde-Giorgis novo Presidente (dal 2001).

En tel 1998, na disputa su le frontiere co l’Eritrea se trasformà en conflito armato. La guera xe finià co el Tratato de Algeri (2000). Na comision internasional dovea ridisegnare el confin. L?Etiopia no la gha acetà el novo disegno e la disputa continua, anca s eno ghe stà scontri armati dal 2000.

Durante le elesioni del 2005, l’oposision gha vinto vari segi, e quasi tuti i governi locali. El governo gha mantegnù el controlo del parlamento co brogli e sospendendo i comuni pi grosi, metendo so omeni al posto de i sindaci eleti da la zente. En tel 2007, trupe etiopiche le xe entrade a Mogadisho par metar fine al governo de le Corti Islamiche, sostegnù da l’Eritrea.