Storia de l'Eritrea

Da Wikipedia, l'ençiclopedia libara.
Va a: navigasion, serca
Sto articolo 'l 'é scrito in veronexe

La Storia de l’Eritrea la xe ona de le pi longhe del continente. La region che ciamemo Eritrea la se snoda longo la costa sud-ovest del Mar Roso, da cual el tol el nome (en greco Ερυθραία, roso) e la continua verso i altipiani etiopici del Tigré.

Preistoria[canbia | canbia sorxente]

I paleontologi i gha fato ricatamenti importanti en Eritrea che i atesta la presensa de ominidi za on milion de ani fa, e de homo sapiens de 125 000 ani fa. Da l’Eritrea pasava ona de le vie utilixà da l’omo preistorico par espandarse fora da l’Africa. Strumenti de piera e de osidiana i se cata ne la baia de Zula e rente de Masaua. Nel sentro e en tel nord del paexe se cata de le piture rupestri de l’era mesolitica.

Storia antica[canbia | canbia sorxente]

Ntorno al 3.500 a.C., grupi umani che vivea en Eritrea i gha costruio picole sità che le vien ciamà cultura de Gash. I resti de sto tempo i xe simili a cuei catà anca en te la val de Nilo e in Nubia. Documenti egizi del XXV secolo i se riferise a sta region co el nome de Punt o de Ta Natjeru – la tera de i dei. En tel XV secolo la faraone femena Hatshepsut la gha mandà na spedision en Eritrea par conosar el posto da doe el incenso e la mira i rivava fin a l’Egito.

La stele de Matara, catada da na spedisione todesca en tel 1913 de la siviltà aksumita

Rente de Asmara, a Sembel, i archeologi i gha catà i resti de na sitàdina del IX secolo a.C. che la gavea conexioni co i sabei del Yemen e co la val del Nilo. L’Eritrea del nord la xe entrà soto el controlo del regno Damat, co cavedal a Yeha en te l’Etiopia del nord. Dopo i Damat, el regno de Aksum el gha tolto el control de sta zona, importante parché la controlava le vie caravaniere da el Mediteraneo a i regni yemeniti de l’Arabia. El cristianesimo el xe rivà da l’Etiopia. El regno de Aksum el gha perso el control de l’area verso el X secolo soto l’influensa de l’Islam.

Regni tribali[canbia | canbia sorxente]

Co la forsa de Aksum la xe finia, la region la se sa diviso longo linee tribali. Al nord, i Beja, on popolo de origine kushitica, el gha fondà sincue regni - Naqis, Baqlin, Bazin, Jarin e Qata – islamici. I Beja i no xe stà boni de impor la so lengoa, e la zente la gha continuà a usar el ge’ez, da do se sa svilupà la lengoa tigrina de ancò.

Mentre che le coste le xera en man a i musulmani, ne i altipiani sentrali el se sa formà on regno cristiano, el Midre Bahri. Sto regno el gha vù na vita corta e el xe stà asorbido da el regno etiopico.

En tel sud, le etnie afar e saho i gha mantegnù na forte division tribale fin al XVI secolo, co i se sa unio par formar el sultananto de Adal, che el prendea rentro anca el nord de la Somalia e Gibuti.

I Otomani[canbia | canbia sorxente]

Dal XVI secolo, el nord el xe finio soto el control otoman co cavedal a Masaua. Soliman el Magnifico el gha concuistà la sità de Masaua en tel 1577 e scominsià la costrusion de novi cuartieri. I otomani i xe rimasti a Masaua par tre secoli e i gha pasà el control de la region a i egisiani, che i lo gha perso co l’arivo de i italiani.

La colonia italiana[canbia | canbia sorxente]

Mapa de le colonie italiane nel Corno d’Africa

Giuseppe Sapeto, prete catolego, el gha comprà la baia de Assab dal sultan de Afar en tel 1869. La baia la xera par el armatore genovexe Raffaele Rubattino. L’Italia la volea verghe de le colonie en Africa e sopratuto longa la costa che la stava diventando la pi importante par el trafico maritimo, co l’apertura del Canale de Suez. I italiani i gha scominsià n’opera de concuista longo la costa a nord, parando via i egisiani, e verso l’interno, scontrandose co l’imperator Yohannes IV. El 1 genaro 1890 la colonia la xera tuta en man italiana co el nome de Eritrea.

L’Italia la xe rimasta en Eritrea fin al 1941. Dopo la guera, l’Eritrea la xe stà mesa en una federasion co l’Etiopia. Ma l’imperatore Haile Selasie, en tel 1961, el gha dichiarà l’Eritrea na provincia etiopica e ridoto la so autonomia.

Liberasion[canbia | canbia sorxente]

Dopo l’anexion de fato da parte de l’Etiopia, i eritrei i gha organisà el movimento de indipendensa. El Fronte de Libarasion Eritreo el gha scominsià a contrastar el potere etiopico. En tel 1970, on nomvo movimento, el Fronte de Libarasion del Popolo Eritreo el gha tolto el sopravento politico e militare.

La lota par l’indipendensa la xe finia co la vitoria en tel 1991. En tel 1993, i eritrei i gha votà on referendum par vedar se la zente la volea rimaner co l’Etiopia o esar indipendente. El 24 magio 1993 l’Eritrea la vegnea proclamà nasion indipendente. El leader de la guerilia, Isaias Afewerki el xe diventà el primo presidente.

Soldai de l’ONU en Eritrea. Photo de Dawit Rezenè

En tel 1998, l’Eritrea la gha causà l’incidente de Badme, on vilagio longo la frontiera co l’Etiopia. La guera che la xe seguia la gha causà la morte de 20 000 soldati eritrei e miliari de sitadini. L’Eritrea la gha perso el conflito armato, ma l’Etiopia la xe stà fermà da l’intervento internasionale. Le trupe ONU le gha tolto el control de na fasia de 20 km a l’interno de l’Eritrea par tegnar i do eserciti stacai. La disputa su la linea de confine la gavea da esar discusa da na comision. L’Etiopia no la gha volù asetar la linea proposta da la comision e la xe rimasta en stato de guera.

L’Eritrea la gha perso economicamente. El presidente el xe diventà on ditatore. Tuti i eritrei i deve far el servisio militare e i no pol ndar fora dal paexe prima de 55 ani de età. L’università la xe serà e no ghe stampa libara. Tuti i giornalisti i xe en prison. El governo el gha espulso i misionari stranieri e meso en prison anca el vescovo ortodoxo. El livel de i diriti umani el xe el pi baso de tuta l’Africa. I servisi segreti eritrei i xe anca responsabili de rapimenti e asasini a l’estero, compresa l’Italia.