Storia de l'Africa

Da Wikipedia, l'ençiclopedia libara.
Va a: navigasion, serca
Date de independensa en Africa

Se pol parlar de Storia de l'Africa solo co l'età del bronzo, co se cata i primi documenti de l'antico Egito. Prima de alora, se pol parlar de l'Africa basandose solo so i ricatamenti archeologici.

Svilupo de l'omo[canbia | canbia sorxente]

Da i ricatamenti paleontologici e archeologici se sa che i primi ominidi - animali progenitori de la spece umana - xera presenti in Africa cinque milioni de ani fa. Dopo verghe svilupà el bipedalismo - el caminar so do gambe - i ominidi i sa slargà su tuta l'Africa. Do milioni de ani fa, xe comparso l'homo abilis, n'ominide bon de usar utensili par tajar la carne. No se sa de sicuro, ma par che el no fuse bon de copar grasi animali, contentandose de magnar le vitime de altri animali caciatori. On milion de ani fa, xe la volta de l'homo erectus. L'erectus xera bon de farse armi, de andar a cacia e de defendarse da grosi predatori. L'homo erectus xe stà el primo a lasar l'Africa e portarse en Axia. Da l'homo erectus sa svilupà l'homo sapiens, el primo vero omo moderno. Ghe ricatamenti de homo sapiens in Africa australe e orientale za 150 000 ani fa. Nel 40 000 a.C., l'homo sapiens gha lasà l'Africa traverso el trato de mar che ancò divide Gibuti da lo Yemen. A quei tempi, el livel del mar l'era pi baso, e se podea pasar a pie, o senza longhi trati de navigasion. Da la penisola araba, l'homo sapiens sa portà en tuto el mondo.

A la fin de l'ultima Era Glaciale (10 500 a.C.), la zona del Sahara xera na grande vale fertile. El Sahara xera abità da tante popolasioni che se dava a la cacia e a la racolta de fruta selvadega. Verso el 5000 a.C., el Sahara gha scominsià a diventar pi seco e la zente la sa spostà verso la val del Nilo e le coste de l'Africa Ocidentale e portando co lori le prime piante domesticà da l'omo: el riso africano e el sorgo.

L'agricoltura propiamente deta la sa svilupà nel 3000 a.C. Café, riso, milio, sorgo, fasoi, bisi, cotone, meloni e suche xe diventà popolari en tuta l'Africa nel giro de pochi ani. A lo steso tempo sa svilupà la produsion de ceramiche. Le piture rupestri de stò periodo mostra i animai, ma sempre pi speso anca l'omo. Popolasioni de la zona de i Grandi Laghi sa spostà su le coste del Mediteraneo e xe rivà fin al fiume Giordano.

Età de i metali[canbia | canbia sorxente]

Nel primi secoli avanti Cristo, la lavorasion del rame, del bronzo e del fero la sa esteso da el nord Africa fin a l'equatore. La lavorasion de i metali la xe stà importà dal Medio Oriente. Ogeti de rame fati da i egisiani de stò periodo xe stà catà en Africa Ocidentale, a testimoniansa che le trate de marcà le xerà za svilupà in sti secoli. La lavorasion de i metali xe rivà ne l'Africa australe solo ne i primi secoli dopo Cristo.

Migrasioni[canbia | canbia sorxente]

Civilizasioni pre-coloniali

Le popolasioni bantu no xe on grupo de zente ligà da on origine comun. I bantu xe on grupo ligà da la lengoa. La majoria de i bantu vien da on grupo original che sà formà a sud de l'Egito che sa poi spostà ne l'Africa Ocidentale, co carateristiche fisiche simili e co na lengoa comune. Ma tra i bantu de ancò ghe anca grupi che xera nilotici e sudanici ma i gha acquisì na lengoa e cultura bantu. Sti popoli i sa moso da la val del Nilo za nel VII - VIII secolo par rivar ne la Nigeria de ancò verso el X secolo, e i xe ste boni de tor el controlo de vaste regioni de l'Africa spostanto i abitanti originali, che xera pigmei. I bantu se sa portà drio l'agricoltura e l'alevamento de animali. Ste abilità i li gha meso en na posision de superiorità su le popolasioni de caciatori e racoglitori, che gha perso el control de el teritorio.

Par la fin del XII secolo, i bantu i sera portà fin en tel sud de l'Africa. En tante regioni, i bantu gha incorporà popolasioni pre-esistenti e i gha dato lori la cultura e la lengoa. Anca ancò, sto proceso el continua, co grupi picinini che i vien asorbii da grupi dominanti.

I popoli nilotici gha scominsià a moverse verso sud nel XVI secolo. Vari grupi originari de la val del Nilo (Sud Sudan de ancò) i sà spostà en te la region ancò ocupà dal Sud Sudan, Kenya, Uganda, Tanzania, e oltre. La majoria de ste popolasioni le sà fermà verso la seconda metà del XIX secolo, anca se ghe stà altre migrasioni minori anca dopo. Le rasie de sciavi, prima, e el colonialismo, dopo, gha de fato fermà el movimento de i popoli ne l'Africa Orientale. Movimento che xe continuà dopo le indipendenze, ma solo rentro i vari Stati e interesando on nomaro de persone pi ristreto.

I popoli sudanici, originari da la zona del Sahara, i sa moso verso ovest co la desertificasion del Sahara e del Sahel. I xe sti popoli che gha formà i vari regni e imperi de l'Africa Ocidentale: i imperi del Mali, de i Fulani, de i Ashanti, de i Hausa e del Kanem-Bornu, el regno Oba del Benin, le federasioni de Dahomey, Oyo, e Aro, i regni Efik, Ibibio, Annang de la costa de la Nigeria. Sensa desmentegarse de le cità stato de i Yoruba e i Hausa.

En tel Africa Australe no ghe mai stà imperi, ecesion fata par el regno de Zimbabwe che controlava lo sfrutamento minerario, el marcà de peli, oro e rame e la trata de i sciavi de la region.

Presenza Eoropea[canbia | canbia sorxente]

Na mapa de l'Africa de Arrowsmith e Lewis del 1812

El Portogalo xe stà el primo a fondare de i porti su la costa africana. L'interese del Portogalo xera quel de verghe de i ponti de sbarco ne la via par le Indie. Le navi le dovea rifornirse de acqua e roba da magnare. No ghe mai stà on grande interese a esplorar l'interno. Steso se pol dir de i olandexi e i inglexi. Anca lori i volea verghe de le basi su la costa par le navi che le ndaa in India.

En tel 1652, l'olandexe Jan van Riebeeck gha fondà la prima colonia stabile in teritorio african da parte de na potensa eoropea. On grupo de Ugonoti francexi sà uniò a i olandexi. En pochi ani, i coloni gha fondà fatorie e costruìo na rete de scambio co i alevatori de bestiame de etnia Khoi. Da stà colonia se sviluperà el Sudafrica de ancò. Co i olandexi xe rivà ne la baia de Table Mountain, dove vegnarà su la Sità del Cao, i abitanti locali xera popoli Khoisan, pigmei che se dava a la cacia e l'alevamento de bestiame. Dopo qualche ano de coabitasion, i coloni gha tolto el control de la region e tratà i neri locali come sciavi o zente de secondo pian.

Etiopia[canbia | canbia sorxente]

Exquisite-kfind.png Par saverghene de pì, varda ła pajina Storia de l'Etiopia.

L'Etiopia de ancò la ricalca pi o meno la masima estenxion de el regno de Aksum. Stò regno el sà svilupà ne i secoli a partir del V secolo prima de Cristo. Ma anca prima, en Etiopia, ghera de le popolasioni che controlava i altipiani e fazea marcà co i egixiani. El regno de Etiopia xera al centro de le vie comerciali che le andava da le Indie a el Mediteraneo. Co l'arivo de l'Islam, l'Etiopia gha perso el control de le vie comerciali ma l'è rimasta indipendente. Se se esclude el periodo coloniale italian, solo sie ani, l'Etiopia xe l'unico paexe africano che no l'è stà mia colonizà. (La Liberia no l'è stà mia colonixà, ma pi de qualche studioso no considera la Liberia no Stato libaro parché l'è stà formà da ex-sciavi mericani che de fato controlava el paexe, co el risultato che i africani originari xera de fato colonixà da sti mericani).

Africa Orientale[canbia | canbia sorxente]

Longo la costa africana da Mogadisio (Somalia) al fiume Rovuma (Mozanbico) se cata la civiliazasion Swahili. I swahili xe na popolasion bantu - vari grupi - che sà miscià co marcanti arabi e persiani a partir dal VII secolo d.C. Se pol parlar de cultura Swahili distinta da altre culture a partir dal 1100. Ancò se pol vedar le roine de grandi cità (Kilwa, Ghedi) e de picoli porti (Shimoni, Jumba la Mtwana), ma anca cità ancora abitae: Lamu, Malindi, Mtwapa, Mombasa - en Kenya; tuta la costa Tanzaniana e l'isola de Zanzibar, e altre roine su la costa del Mozanbico.

A l'interno, i kamba e i kikuyu controlava le carovane de marcanti e xera boni de controlar teritori vasti, anca grazie al suprplus alimentare che i gavea. I regni de i baganda, del Ruanda e del Burundi i controlava la regione de i Grandi Laghi.


Africa del Nord[canbia | canbia sorxente]

Exquisite-kfind.png Par saverghene de pì, varda ła pajina Storia de l'Egito.

En tel Egito sa svilupà ona de le pi grandi civilizasioni del mondo antico. Za nel 3100 a.C., l'Egito xera riunio en uno Stato che diventarà sempre pi potente, economicamente, militarmente e par le conosense inteletuali. I monumenti che resta fin ancò (le piramidi, i grandi templi e i palasi de i faraoni) xe na testimoninasa a la grandessa de i antichi egisiani. Na olta se pensava che i egisiani fuse bianchi de origine mediteranea sensa contati co l'Africa a sud del Sahara. Ancò savemo che ghera contati co i regni de l'Africa nera e che de le dinastie de faraoni xera de neri de la Nubia.

El nord de l'Africa xera abità da i berberi, ma gha anca visto la fondasion de colonie fenice, greche, israelitiche, romane, fin a la colonizasion romana che gha esteso el so impero fin al Maroco de ancò. I fenici gha fondà Cartagine, che diventerà na potensa de prima grandessa. I greci gha fondà Cirene, che controlava la Cirenaica. Cartagine, Cirene e l'Egito xe stà mesi soto el controlo de Roma co le Guere Puniche (146 a.C.) e la catura de Alesandria nel I secolo a.C. El control de el nord Africa xe andà a i Vandali dopo le invasioni del V secolo d.C.

L’Islam[canbia | canbia sorxente]

Co l’avento de l’Islam, el nord de l’Africa xe pasà soto el controlo de Arabi o de popolasioni islamisade en tel VII secolo. Tute le popolasioni cristiane xe diventà musulmane, co la ecesion de l’Egito doe na forte minoranza cristiana xe rimasta fin ancò.

El Islam gha anca penetrà el Sudan, doe che ghera tre regni cristiani. Dopo secoli de resistensa, questi xe cascà soto el control islamico, anca se ghe rimaste de le tradisioni de origine cristiana. Per esempio, en tel nord Sudan, ancora ancò le done porta i puteleti de quaranta giori al fiume, i le mete soto l’acqua e dixe na benedision che ricorda el batesimo e Zuan Batista.

En tel nord Africa, i berberi xe diventà musulmani e gha scominzià la conquista de la Spagna, do xe rimasti par vari secoli. Co l’arivo de i Fatimidi (X secolo) l’Egito e tuto el Maghreb xera controlà da el Cairo. Dopo i Fatimidi xe stà el turno de Almoravidi e Almoaidi. Co la conquista de l’Egito da parte de i Turchi – periodo Otoman – en tel 1517, tuto el nord d’Africa xe stà diviso ne le regenze de Algeria, Tunisia, e Tripoli. El Maroco xera in man a i berberi Sharifani.

Anca sensa controlar i paexi politicamente, i musulmani gha esteso la so influenza a sud del Sahara en tuta le region de el Sahel e su la costa Atlantica fin a la Nigeria. El pensier filosofico e la cultura islamica en generale (co i so avanzamenti en medicina e altre siense) xe rivà en Egito (università de Al-Azar) ma anca a Timbuctu e fin in Mauritania (oasi de Cingueti), dove ancora deso se cata manoscriti medievali de cultura araba e islamica).

L’influenza araba xe rimasta a livel religioso, ma la sa perso a livel intelectuale e politego. Za nel XV secolo, i Mori gha perso el contro de la Spagna e de cità importanti come Ceuta e Melilla. I venexiani e i genovexi i controlaa el marcà co l’Eoropa e i Stati islamici del nord Africa xe diventà paexi de pirateria ma sensa on vero control so la politica mediteranea. A livel inteletuale, i musulmani del nord Africa no gha pi vesto da dir de novo. El declino culturale de l’Islam l’è continuà fin ancò. Solo l’università de Al-Azar gha continuà a laorar, ma sensa na produsion nova de sciense. Anca la ricerca teologica pi importante l’è pasà a le comunità islamiche de la Sicilia fin a l’arivo dei Normani.

La trata de i sciavi[canbia | canbia sorxente]

Par secoli ghe stà na trata de i sciavi da l’interno verso i marcà de el nord Africa e de l’Arabia. Co l’arivo de i camei, nel X secolo, la trata la xe cresuda. Milioni de africani neri i xe stà portà en te i paexi islamici, ma anca in Eoropa. Ancò no se vede na granda influensa de neri en te i paexi islamici parchè i omeni vegnea castradi par farli laorar en te i harem. Anca i fioi che sciave nere gavea co i paroni arabi vegnea castradi da buteleti.

Diversa xe stà la trata de neri co le Meriche. I sciavi portà en Brazil, nel centro e nord de la Merica i servia come lavoradori de i campi. La metà circa de i sciavi che lasava l’Africa i moria nel viagio de andata. La trata xera alimentà da la cacia ai sciavi da parte de popolasioni locali, ma anca de eoropei. Anca se no ghe calcoli precisi, se crede che la metà de la popolasion africana xe stà portà come sciavi ne le Americhe, en te i paexi del Maghreb o ne i paexi islamici de l’Axia. El pi famoso marcante de sciavi xera Tippu Tip. La schiavitù xe ancora viva en Sudan e en Mauritania.

Esplorasion de l’Africa[canbia | canbia sorxente]

Mapa de l'Africa prima de la Grande Guera

En tel XIX secolo, l’Eoropa gha scominsià a guardar a l’Africa par la so espansion industriale. El continente el xera rico de materie prime, e gavea de i interesanti posti che permetea el control de el trafico comerciale mondiale. Misionari cristiani e esploratori pagà da le organizasioni giografiche eoropee gha scominsia a entrar ne l’interno. La majoria sa fato pasar par zente che esplorava l’ignoto, anca se i seguea i sentieri usà da secoli da le popolasioni locali o da i marcanti arabi. Sto quà l’è stà el periodo de David Livingstone, che dal 1849 gha esplorà el Botswana, Malawi, Zanbia e la Tanzania. Burton e Speke xe rivà su le sponde de el Lago Vitoria en tel 1858, ritornando i xe pasà da la Misione de Santa Croce doe lavorava Daniele Comboni, misionario veronexe, e i gha ‘scoverto’ la nova strada che seguiva el Nilo. Altri esploratori gha pasà el deserto del Sahara, desmentegandose che i berberi gavea fato la stesa roba per pi de domila ani.

Le esplorasioni de eoropei gha vù el grande merito de verzar la mente eoropea su l’esistensa e l’importanza de l’Africa. Sta nova conosensa l’è stà usà da la Conferensa de Berlin par dividar l’Africa tra le potense eoropee.

A i inisi del XX secolo, tuta l’Africa xera soto el control o l’influenza de on paexe eoropeo, co l’ecesion de l’Etiopia. En quasi tute le colonie africane, le potense eoropea gha iudà la formasion de na popolasion bianca, che podese controlar l’economia de lo stato. Bisogna parò dire che no sempre la potensa coloniale xe stà bona de estendar el control su tuto el teritorio. Per esempio, en Sudan, ghe da i posti doe i inglexi no xe mia rivà durante l’ocupasion coloniale. Lo steso se pol dir par la Nigeria e altri paexi de l’Africa Ocidentale.

Indipendenza[canbia | canbia sorxente]

Sfere de influenza eoropea in Africa, 1914

El proceso de decolonizasion de le nasioni africane gha scominzià en tel 1951, co l’indipendenza de la Libia. I paexi soto el control italian, inglexe e francexe iè diventà indipendenti par la fin de i ani Sesanta. I ultimi paexi a rivar a l’indipendenza xe stà quei soto el controlo portoghexe, ne i ani Setanta. Gibuti l’è diventà indipendente en tel 1977 e la Namibia en tel 1990. El teritorio del Sahara Ocidentale xe ancora soto el control de el Maroco.