Quarta Crociata

Da Wikipedia, l'ençiclopedia libara.
Va a: navigasion, serca
Quarta Crociata
Parte de le crociate
ConquestOfConstantinopleByTheCrusadersIn1204.jpg
La conquista de Costantinopoli da parte dei crociati
Data: 1202-1204
Posto: Costantinopoli, Zara, Balcani
Èxito: creazion de l'Inpero Latin d'Oriente
Modifiche teritoriałi: spartizion de l'inpero bizantin tra i crociati
Schieramenti
Cross Templar.svg Esercito crociato
Bandiera della Repubblica di Venezia.gif Republica Veneta
Palaiologos-Dynasty-Eagle.svg Inpero bizantin
La sità de Zara
Comandanti
Bonifacio I
el doxe Enrico Dandolo
Isacco II Angelo
Alessio III Angelo
Alessio V Ducas

La Quarta Crociata la xe stà bandìa da papa Innocenzo III nel 1198, e la gavea da verghe come obietivo la riconquista de Gerusalemme tramite l'invasion de l'Egito. Inveze ora de la fine l'esercito crociato el sà direto verso Costantinopoli, che nel 1204 la xe stà conquistà e sachegià. L'Inpero bizantin el xe stà quindi spartìo tra i crociati, e un quarto e mezo de i so posedimenti i ghe xe ndà a Venexia, che la gavea messo le so navi a disposizion dei crociati.

Antefato[canbia | canbia sorxente]

La sità de Gerusaleme, conquistà durante la Prima Crociata nel 1099, la xera stà riciapà dai mori de Saladin nel 1187, e durante la Terza Crociata (11891192) i cristiani no i era stà boni de riconquistarla. Nel 1199, dopo che el papa Innocenzo III el gavea invità la cristianità a far na nova crociata, sà radunà n'esercito, fato sopratuto da zente de la Francia, ma anca un póchi da Germania e Fiandre, soto el comando de Bonifacio I marchese del Monferrato.

La presa de Zara[canbia | canbia sorxente]

El doxe Enrico Dandolo l'anuncia la crociata ne la Cesa de san Marco a Venexia

I crociati i s'avea conbinà coi Venexiani par farse trasportar par mar fin in Egito, dove i volea sbarcar e atacar el Cairo. Però na olta che l'esercito el xe rivà a Venexia (in soli 12 000 òmeni quando se ghe ne spetava 33 500), i sa incorto de no verghe mìa schei in bisogno par pagar le navi: i venexiani i domandava 85 000 marchi d'arxento, ma i crociati i podea rivar solo fin a 51 000. Elora i venexiani i sa spaentà, parché lori i gavea zà fato dei investimenti, interonpendo parfin el comercio con l'Oriente, par preparar la spedizion, e desso i ris-ciava de rimétarghe na barca de schei.

Donca el vecio doxe Enrico Dandolo, che anca se l'era orbo dal tuto, in realtà el ghe vedea distante, el ga fato na proposta: sicome nel 1181 la sità de Zara la s'avea ribelà ai venexiani, se i crociati i la riconquistava i so debiti i sarìa stà scancelà. I crociati i ga acetà, e ne l'autuno 1202 la flota la xe partìa verso Zara, che in zinque giòrni la xe stà conquistà e sachegià. Quando el papa el ga savùo che i crociati i gavea alsà le mane contro altri cristiani, el xe ndà in bestia, e el volea scomunicarli tuti; ma a la fine el sà contentà de scomunicar solo i venexiani, e lassar che la crociata la continuesse.

El dirotamento su Costantinopoli[canbia | canbia sorxente]

I crociati i entra a Costantinopoli, pitura de Eugène Delacroix

Intanto a Costantinopoli nel 1185 l'inperador Isacco II l'era stà deposto e messo in preson da so fradel Alessio III, che el gavea fato anca cavar i oci. Nel 1202 so fiol de Isacco, Alessio IV, l'era riussìo a scapar via e rifugarse in Germania; dopodiché el sà messo in contato coi crociati e con Venexia prometendo schei, aiuto militar e parfin la riunion de la Cesa Ortodossa con quela Catolica, a conto che i crociati i metesse lu sul trono de Bisanzio al posto de so zio Alessio III. El papa no ghe parea vèra de poder riunir le do Cese, e quindi el sa fato convìnzar a dirotar la crociata su Costantinopoli, cavandoghe la scomunica ai venexiani.

El 25 de avril 1203 i crociati i xe ripartìi da Zara, e a fine giugno i xe rivà ne la sità de Galata (na olta dita Pera) proprio de fronte a Costantinopoli. Ma mentre Alessio IV el gavea garantìo che i sarìa stà ben ricevùi, no xe mia stà cussita, e ghe xe volù calche giòrno de batalia prima che el 17 de lujo i crociati i podesse sfondar le mura e entrar in sità. Elora l'usurpador Alessio III, vedendo che la 'ndava a finir mal, el xe scapà via da la sità portandose drio el tesoro inperial. Isacco II el xe stà liberà e rimesso sul trono, con so fiol Alessio IV come coreggente.

A sto punto Alessio IV el gavaria dovù mantegner le promesse, ma schei no ghe n'era e la riunion de le do Cese no la ghe 'ndasea a genio né al popolo né ai preti. Alessio el ga zercà de tirarla in longo, ma intanto i crociati i restavà acanpà pena fora la sità e la popolazion la scuminsiava a ruzar e brontolar par le scoribande dei crociati. Durante un scontro tra alcuni crociati e i greci xe s-ciopà parfin un incendio, che el ga brusà un toco de la sità. A un çerto punto ghe xe stà na rivolta comandà da so cusin de Alessio IV, Alessio V dito Murzuflo, che el ga fato strangolar Alessio IV, mentre Isacco II el xe morto anca lu poco dopo, no se sa ben el parché. Alessio V, ciapà el potere, el sa rifiutà de pagar i crociati, e anzi el ga ordinà che i 'ndesse via da Costantinopoli.

El sachegio[canbia | canbia sorxente]

I cavai de bronzo su la Basilica de San Marco a Venexia

I crociati naturalmente no i gavea la minima intenzion de 'ndar via, e i sa parecià par conquistar la sità. El 12 de avril 1204, dopo póchi giòrni de conbatimento, i crociati i xe sta boni de scalar le mura, grazie a un stratagemma inventà dai venexiani: questi i ga costruìo dele piataforme in zima ai àlbari de le navi, e dopo i ga fato inclinar le navi da na parte in maniera che le piataforme le rivesse a tocar le mura. Un grupeto de soldà i ga podù quindi ocupar le mura e verzar le porte de la sità fasendo entrar el grosso de l'esercito. L'inperador Alessio V el xe scapà via anca lu, e durante la note gà ciapà el potere Costantino XI Lascaris, che el ga zercà inutilmente de fermar i crociati.

El 13 de avril xe tacà el grande sacco de Costantinopoli. I crociati i ga scuminsià a entrar in tute le case e le cese portandose via le opere d'arte e tuta la roba de valor. Tuto quel che no se podea portar via el vegnea fuso o distruto. I sitadini i vegnea torturà parché i disese dove i gavea sconto i so tesori, e un mucio de zente la xe stà copà o violentà. A la fine, dopo 14 giòrni de inferno, i comandanti dei crociati i ga finalmente fermà el sachegio, i ga fato muciar tuto el bottino in tre cese e i ga provedù a spartirselo. I venexiani i sa portà via i quatro cavai de bronzo che desso se pol vedar su la baxéłega de San Marco a Venexia, e un mucio de reliquie che desso le fa parte del Tesoro de San Marco.

Conclusion[canbia | canbia sorxente]

Statua del primo inperador latin Baldovino

L'Inpero bizantin el se ga desfà, e i so teritori i xe spartìi tra i crociati, che i ga fondà al so posto l'Inpero latin d'Oriente. El primo inperador el xe stà Baldovino IX de Fiandra. Un quarto de le tere conquistà el ghe xe ndà a l'Inpero, el resto el xe stà spartìo a metà tra i crociati, che i ga fondà vari Stati, e la Republica Veneta, che la xe stà la vera vincitrice. Difati i venexiani i gà guadagnà un mucio de posedimenti: la costa osidental de la Grecia, tuta la Morea, Nasso, Andros, Negroponte, Gallipoli, Adrianopoli e i porti de la Tracia sul mar de Marmara, oltre ai tre otavi de la sità de Costantinopoli, e in seguito anca l'isola de Candia. Da de lora el Doxe el ga asunto el titolo de “Dominus quartae partis et dimidiae totius Imperii Romaniae”, cioè Signor de un quarto e mezo de l’Inpero Roman d’Oriente.

In çerte xone la nobiltà bizantina la xe comunque riussìa a restar indipendente e a fondar dei Stati bizantini, come l'Inpero de Nicea e quel de Trebisonda. L'Inpero latin comunque nol xe mia 'ndà vanti tanto, parché zà nel 1261 Michele VIII Paleologo inperador de Nicea el ga riconquistà Costantinopoli.

El papa Innocenzo III, quando el ga savù del sachegio, el xe restà inoridìo, anca parché el so legato, Pietro de San Marcello, el gavea siolto i crociati da la promessa de libarar Gerusalemme. La crociata quindi la se ga fermà qua, e solo pochissimi crociati i ga continuà par conto suo fin in Terasanta. La Cesa Ortodossa e quela Catolica le xe restà divise.