Piaza Bra

Da Wikipedia, l'ençiclopedia libara.
Va a: navigasion, serca
Sto articolo 'l 'é scrito in veronexe
El listón de piassa Bra, ciapà dal'Arena.

Piassa Brà l'è el nome de ła piassa çentral e piasè granda de ła çità de Verona. Sui cuatro lati de ła piassa se cata alcuni dei edifici e dei posti piasè inportanti de ła çità: el Listón, l'Arena, el palasso Barbieri indove ghe stà el sindaco e el palasso de ła Gran Guardia.

Nome[canbia | canbia sorxente]

El nome, de antica tradision, el ven da ła 'osse longobarda braida, che corisponde al tedesco Breit, "largo", e che vol dir "estension, anpiessa, canpagna piana".

Sto significato che l'è dimostrà da ła presensa de altri dó toponimi conpagni senpre a Verona: ła Bra dei Mołinari e San Giorgio in Braida. Quindi ła denominasion ufiçiałe de "Piazza Brà" in realtà ła sarìa na tautołogia, cioè sarìa come dir "piassa piassa": difati, a Verona tuti quanti i dixe soło "la Bra", sensa zontarghe altro.

La 'osse bràida, de uxo comun intel diałeto veronexe de na òlta, intorno a l'ano Mile ła gà evidentemente perso la –j- e l'è pasà a brada, par dopo deventar braa (come gà scrito nel Trexento anca el Boccaccio) e quindi bra. La stesa –j- che casca ła se gà vùa 'ntel veronese bròl (che sarìa el "fruteto") dal tardo latìn broglium.

Intel periodo de ła Serenìsima Republica la Bra l'è stà anca dita Piassa d’arme, parché i soldà i ghe faxéa łe exercitasion.