Pałaso Labia

Da Wikipedia, l'ençiclopedia libara.
Va a: navigasion, serca
Sto articoło el xe scrito in venesian
Pałaso Labia dal Ponte de łe Gułie

Pałaso Labia xe un pałaso baroco del sestièr de Canaregio a Venesia, costruìo infra el XVII e 'l XVIII secoło. Nel Sałón da bało Giambattista Tiepolo gaveva depénto uno dei so caolaóri. El ciclo de afreschi dedicà ałe Storie di Antonio e Cleopatra, su comisión dei fradèłi Angelo Maria e Paolo Antonio Labia.

Afiancà a ła Cexa de San Geremìa, l'edificio xe situà visin a ła confluensa del Canal de Canaregio 'ntel Canal Grando; verso i quałi revòlxe łe do fasade più antighe; el terso prospeto varda su Canpo San Geremia.

I Labia che rivava in orìxene da ła Catałogna gera stài iscriti al Patriarsado Venesian 'ntel 1646 dopo aver contribuìo co' un'ingente sóma ała Guera de Candia. I galdèva infati enormi richése che i spendeva in lusi, feste e in sto pałaso, scominsià poco dopo questa data.

Architetura[canbia | canbia sorxente]

Le fasàe so'i canałi, atribuìe variamente ad Andrea Cominelli, ad Alessandro Tremignon e a so fìo Paolo, riciapa modełi del Longhena. I préxenta un pepiàn dorico bugnà e piani superióri de órdene ionico e corinsio co' balcóni nobiłiài da mascaroni e balconàe continue. So ł'atico xe scolpìe łe aquiłe araldeghe dei Labia, intersàe co' ocułi ovałi.

La fasàda so 'l canpo, reałixàda intorno al 1730 riciapa, senplifegandoło, el stìl de łe altre do; no xe certa ł'atribusión del dexégno a Giorgio Massari, che sicuramente gaveva verto a ł'interno el monumentàl Sałón da bało.

Interno[canbia | canbia sorxente]

El ciclo de Giambattista Tiepolo[canbia | canbia sorxente]

Incontro tra Antonio e Cleopatra, afresco de Giamabattista Tiepolo

.

In sto sałón Giambattista Tiepolo gà depento el maxéngo ciclo de afreschi dedicà ałe Storie di Antonio e Cleopatra (1746-1747), co' ła quadradùra trompe-l'œil de Gerolamo Mengozzi-Colonna, che se integra parfetamente coi episodi narativi, indove personagi sontuoxamente vestìi ciapa poxe teatralmente ełoquenti. Ne ła volta drento un ocuło centrałe xe Bellerofonte su Pegaso va verso la Gloria e l'Eternità, ne łe paréde infra fegure ałegoriche e mitołogiche xe prexénti łe do sène prinsipàl l'incontro tra Antonio e Cleopatra, ne ła Sała dei Spèci 'ntel sofito reałixa el Trionfo di Zefiro e Flora.

Altre òpare[canbia | canbia sorxente]

Tante altre sałe del pałaso xe decoràe da interesanti dipinti: se cata òpare de Giandomenico Tiepolo, Palma il Giovane, Giambattista Canal, Placido Costanzi, Agostino Masucci, Pompeo Batoni, Gregorio Lazzarini, Gaspare Diziani, Antonio Visentini. Notevołe anca un ciclo de arasi fiaminghi co' Storie di Scipione.

Questa richésa artistgea gà avùo in Maria Labia una de łe prinsipałi ispiratrici; se dise ritrata in Cleopatra ne ł'Incontro del Tiepoło.

Storia[canbia | canbia sorxente]

La fortuna e ła vita mondana dei Labia gà avùo fin 'ntel XIX secoło e 'l pałaso gera stà vendùo ad un prìnsipe dei Lobkowicz; staltri ło gà cedùo ała benefica pìa Fondasión Israełitica Königsberg, che ło gà tramexà in vari partaménti da fitàr. Ghe gà trovà alòxo 'na fabrica de stòfe, 'na segarìa e diverse famégie, che 'ntel sałón da bało destiràva ła lìsia.

'Ntel dopoguèra el novo propietario, Carlos de Beistegui, gà reałixà dei primi inportanti restauri e gà sercà de riportàr el pałaso al so precedente splendor, integrandoło de aredi d'epoca ed òpare d'arte. El 3 setenbre 1951 gà organixà nel pałaso una infra łe più bełe feste del secoło: tuta ł'alta società internasionałe se gà incontrà 'ntel Sałón da bało in abiti setesenteschi, tanti dei quałi dexegnài da Christian Dior e da un xovene Pierre Cardin, Cecil Beaton ghe n'à reałixà un memorabiłe reportage fotografico.

'Ntel 1964 De Beistegui gaveva cedùo a ł'asta el pałaso a ła RAI, che ghe n'a fato ła so sede regionałe. L'ente gà efetuà precixi restauri sia a ł'edificio che a łe òpare d'arte.

In vista de un trasferimento a Malghera, la RAI gà invià 'ntel april 2008 'na procedura de vendita, łigàda ad un uxo non alberghiero ma espoxitivo o culturałe (cofà richiesto dal Comùn de Venesia).

Bibliografia[canbia | canbia sorxente]

  • Marcello Brusegan, La grande guida dei monumenti di Venezia. Roma, Newton & Compton, 2005. ISBN 88-541-0475-2.
  • Guida d'Italia - Venezia 3a ed. Milano Touring Editore, 2007. ISBN 978-88-365-4347-2.
  • Elsa e Wanda Eleodori. Il Canale Grande. Palazzi e Famiglie. Venezia, Corbo e Fiore, 2007. ISBN 88-7086-057-4.
Pałaso Labia dal Canal Grando

Voxe łigàe[canbia | canbia sorxente]

Altri progeti[canbia | canbia sorxente]


Cołegamenti esterni[canbia | canbia sorxente]