Otava guera turco-venexiana
| de le guere turco-venexiane | |
|---|---|
 Pianta de la sità de Corfù inte el 1688, con mostrà le fortificazion | |
| Tipo | Guera  |
| Data | 1714-1718 |
| Liogo | Morea (Peloponeso), ìzołe Jonie |
| Rexultà | Vitoria turca |
| Schieraminti | |
| Comandanti | |
L'otava guera turco-venexiana la xe stà conbatùa tra el 1714 e el 1718 da la Republica Veneta e da l'Inpero Otoman. La xe sta l'ultima guera conbatùa tra le do potenze, e la xe terminà con la vitoria otomana e la perdita del pi grando posedimento veneto in Grecia, la Morea (el Peloponeso de uncuó). Venexia la xe stà jutà da l'intervento austriaco inte el 1716, che el ga costreto i turchi a firmar el Tratado de Passarovitz inte el 1718, chel ga messo fin a la guera.
La conquista turca de la Morea[canbia | canbia el còdaxe]
La guera la xe tacà el 9 de dicenbre 1714, quando l'Austria la jera inpegolà inte la guera de sucesion spagnola e quindi i turchi i ga pensà che fusse el momento bon par riconquistar i teritori persi par man dei venexiani inte la guera de Morea (1683-1699). El Gran Visir Silahdar Damat Ali Pasha, inte i primi mesi del 1715, el ga radunà un gran esercito de 70 000 òmeni o 80 navi da guera, che le ga provedù subito a ciapar i ultimi posedimenti veneti inte el mar Egeo, le ìzołete de Tinos e Egina.[1]
I venexiani, che no i gavea n'esercito stàbiłe sul posto, i podea contar solo su 8 000 soldai e 42 navi, perlopiù picenine, par cui no i ghe la fasea gnanca a téndar tute le fortificazion che i gavea costruìo inte i ani precedenti. In piu la popołasion del posto no la jera mìa contenta del dominio venexian, par cui quando Damat Ali el ga prometesto de rispetar l'incolumità e le proprietà dei greci, i sà messo a darghe grandi rifornimenti ai otomani,[2] mentre inveze i venexiani, che i sperava de reclutar na milizia locale, i xe restà isolà inte i so forti.
El 25 de zugno i turchi i ga traversà l'istmo de Corinto, ciapando la sità e fasendo strage dei abitanti[3]. Dopo i sà direto verso Nauplia, che la jera ben proteta da 2 000 òmeni, ma la xe cascà el 20 de lujo dopo soli nóve giòrni de asedio, quando na mina la xe s-ciopà soto el bastion de Palamidi metendo in fuga i difensori e portando un colasso xeneral de la difesa.[4]
I venexiani i ga quindi abandonà i forti de Navarin e de Coron, conzentrandose tuti a Modon. Ma dopo ver spetà inutilmente socorso da la marina veneta comandà da Delfin, i sa reso.[5] Le ultime piazeforti venexiane, conprese le forteze che restava a Candia (Spinalonga e la Suda), le sà reso anca lore, e cussita l'intera Morea la xe stà ciapà dai turchi in solo un zentinaro de giòrni.[2]
L'asedio de Corfù[canbia | canbia el còdaxe]
Dopo sto sucesso, i otomani i se gà spostà verso le ìzołe Jonie, controlà dai venexiani, e i ga ocupà Santa Maura e el forte de Butrinto di fronte a Corfù. L'8 de lujo 1716 n'armada de 33 000 òmeni la xe sbarcà a Corfù, la pi inportante de le ìzołe Jonie.[6] Dopo na inconclusiva batalia naval el stesso dì, i otomani i xe avanzà verso la sità de Corfù, asediandola el 19 de lujo.[7] La difesa la jera comandà dal conte Johann Matthias von der Schulenburg, che el gavea zirca 8 000 soldai soto de lu. Grazie a le potenti fortificazion e al corajo e la determinazion dei difensori, la sità la xe parò riussìa a resìstar, e dopo na granda tonpesta el 9 de agosto, i otomani a ghè tocà ritirarse.[7]
Intervento austriaco e conclusion de la guera[canbia | canbia el còdaxe]
Inte l'istà del 1715, l'armada turca la gera drio tacare la Dalmasia: ma la xe stà sconfita e respinta dale trupe venete a Sinj.
Intanto, col suporto finanziario del papa Clemente XI e la Francia che sà fato garante dei posedimenti austriaci in Italia, l'Austria la sà deciso a intervegner. El 13 de avril del 1716 l'enperador Carlo VI el ga rinovà l'aleansa co Venexia e el xe entrà in guera contro i turchi. Ghe xe stà oncora calche scontro naval tra Venexia e i otomani, come a Imbros inte el zugno 1717 e la batalia de Matapan el mese dopo, ma no le xe stà decisive. Dopo le vitore austriache a la batalia de Petrovaradin inte el 1716 6e a Belgrado inte el 1718, i turchi i ga dovù firmar el Tratado de Passarovitz, con cui i ghe cedea un bel po' de tere a l'Austria, ma i se tegnea la Morea, mentre Venexia la ga podùo mantegner le ìzołe Jonie.
Fonti[canbia | canbia el còdaxe]
- History of the Hellenic Nation, Vol. XI, Ekdotiki Athinon 1975
- George Finlay. The History of Greece under Othoman and Venetian Domination. William Blackwood and Sons, Londra, 1856
Riferimenti[canbia | canbia el còdaxe]
- ↑ Finlay, p. 264
- ↑ 2,0 2,1 L.S. Stavrianos, The Balkans since 1453, p. 181
- ↑ Finlay, pp.266-268
- ↑ Finlay, pp.270-271
- ↑ Finlay, pp.272-274
- ↑ J. Norwich, A History of Venice, 579
- ↑ 7,0 7,1 The history of Corfu Archivià l'11 de aprile 2009 in Internet Archive. at corfuweb.gr
Wikimedia Commons el detien imàjini o altri file so Otava guera turco-venexiana
