Muro de Berlin

Da Wikipedia, l'ençiclopedia libara.
Va a: navigasion, serca
El Muro de Berlin co la Strisia de la Morte

El Muro de Berlin el xera na longa mura che corea tutintorno a la parte ovest de la sità de Berlin, che la fasea parte de la Germania Ovest, separandola dal resto de la sità e dai teritori intorno, che inveze i fasea parte de la Germania Est. El xe restà in pié dal 13 de agosto 1961 fin al 9 de novenbre 1989, e l'era el sinbolo de la division de la Germania e de l'intera Europa (l'ovest capitalista e filo-merican, l'est comunista controlà da l'Union Sovietica).

Spartizion in xone de ocupazion de la Germania, 1945

El Muro el xe nato parché dopo che la Germania nazista la ga perso la seconda guera mondial, l'è sta spartìa in quatro xone de ocupazion, controlà e 'ministrà rispetivamente da USA, URSS, Gran Bretagna, Francia, e la stessa division l'è sta fata anca ne la sità de Berlin (che la jera par intiero drento la xona de ocupazion sovietica). Elora nei anni dopo el 1945, par via de la guera freda tra USA e URSS, la Germania l'è sta spartìa a metà: ne le tre xone inglese, francese e mericana xe nata la Republica Federal Todesca (RDT), ne la xona sovietica la Republica Democratica Todesca (DDR), con un regime comunista.

I quatro setori de ocupazion de Berlin

Nei anni seguenti, senpre pi gente la scapava via da la Germania Est, dove no ghera libertà e democrazia, e i traversava la frontiera par ndar a star a l'Ovest (do milioni e mezo de persone tra el '49 e el '61). A un zerto punto, el goerno de l'Est el ga decidesto, par fermar sta "fuga", de costruir na bariera longo tuto el confine, mia tanto par inpedirghe ai nemici de passar de qua, quanto par inpedirghe ai propri sitadini de passar de là. Cosita durante la note tra el 12 e el 13 agosto del 1961 i ga tirà na bariera de filo spinà intorno a Berlino Ovest, sostituia nei mesi seguenti da na mura de piera e cimento. N'altra bariera la corea longo tuto el confine tra le do Germanie, dal mar del Nord fin a la Cecoslovachia.

Se stima che nei 28 anni che ghera el Muro, zinquemila persone le gavia proà a traversarlo; e un numaro de persone conpreso tra 192 e 239 i xe morti zercando de passar de là.[1][2]

El 23 de agosto del 1989 l'Ongaria la verze el confine co l'Austria, e pi de tredesemila citadini de la Germania Est i ghe ne aprofita par scapar in Germania Ovest tramite sti du paesi. In autuno, dopo grandi dimostrazion de massa a l'Est, el leader de la DDR Erich Honecker el ga dovesto dar le dimision, e el novo goerno el ga deciso de verzar le frontiere. La disposizion la dovea entrar in vigore el 10 de novenbre, ma zà la sera del 9 na valanga de gente la sa presentà ai valichi de frontiera; le guardie, spaentà, le ga verto i cancei, e un saco de Berlinesi de l'Est e de l'Ovest i ga tacà a far festa intorno al muro, e calchedun sa messo con martei e piconi a tirar zo tochi del muro. El 18 de marzo del 1990 ghe xe sta le prime elezion libare in Germania Est, e el 3 otobre 1990 la Germania l'è sta riunificà. Dal 13 de giugno del 1990 xe tacà l'abatimento "uficiale" del muro, prima par opera de le guardie de frontiera de la DDR (le stesse che le gavea presidià el muro par tanti anni) e dopo da l'esercito. Ancó del muro resta solo calche tochetin, lasà come monumento storico e artistico (difati su bona parte del muro ghe xe graffiti e murales contro la guera e l'opresion).

Note[canbia | canbia sorxente]

  1. (EN) http://www.dailysoft.com/berlinwall/history/facts_01.htm
  2. (EN) http://www.die-berliner-mauer.de/en/fakten.html


Ligami foresti[canbia | canbia sorxente]

Commons

So Commons ghe xè de i file multimediałi so Muro de Berlin