Majolera

Da Wikipedia, l'ençiclopedia libara.
(Rimando da Malga)
Va a: navigasion, serca
Sto articol al é scrit in belumat
Vache che màgna l'erba
La majolera Veniòta, in Trentin

La majolera la è al conplesso costituì da la casera, da 'l staol o da la pendana, da 'l casel, eventualmente da qualche costružion secondaria (fontana, posa) e da 'l teren destinà a pascol, al tut destinà a 'n uso limità a la stajon estiva e ubicà 'te na zona de montagna (de solito fra i 600 e i 2700 m s.l.m.). Le majolere le é tipiche del nord Italia.

Sta unità produtiva la scominžia la so produžion a 'l inižio de la istà, quando che al vacher al to sù le vache de i contadin de la val par portarle in montagna. Žerte olte al fondo al gnen segà una o doi olte prim de pascolarlo, e sto laoro al ciapa al nome de "cargar montagna".

I vacher i molž le vache a la matina bonora e a la sera, i le assa pascolar de dì e i le manda te 'l staol o te la pendana de not. Par beararle i dopera na fontana o na posa. La lat moldesta i la met in fresca te 'l casel in modo che no la vae agra e che gnene par sora la pana.

Da la laoražion de la lat se fa formai, botiro e poina. Al lapin al gnea beest in minima part da 'l vacher (al fa ndar a 'l cesso), e par la gran part al ghe gnea dat insieme de 'l scòlo a i vedei.

A la fin de la stajon i vacher i torna a portar le vache a val ("desmontegada") in ocasion de la qual gnen fat na festa.

La realtà de la majolera te 'l secondo dopoguera la à cognossest an periodo de crisi par mancanža de redito e de vacher, e par an disintaresse general verso i formai che no è de lat pastorizada e che no i à senpre al stesso gusto.

De i ultimi ani è partì an descorso de contributi par la valorizažion de le majolere che al à portà a 'n rimodernament de le struture e de i machinari doperadi par far formai.

Al Parco Nazionale Dolomiti Bellunesi par esenpio al à organizà tut an troi tematico che al met in comunicažion quasi tute le majolere e le laterie aonde che gnen fat formai particolari, ciamà apunto "la strada dei formaggi".

Resta anca da dir che mandar a past de vache o le žede al permet de concimar al teren in modo da jutar eventuai piante da fruto, utili par al on e anca par i osei, ma la funžion pì inportante la è quela de magnar l'erba, in modo da garantir an rinovament de la vegetažion evitando cossì che gnene avanti la lespa e limitando al ris-cio de incendi.