Luciano Ligabue

Da Wikipedia, l'ençiclopedia libara.
Va a: navigasion, serca
« Mai visto un muxicista comunicare col publico come che xe bon de far Luciano[1] »


Broom icon.svg
El modèl {{Bio}} no'l funsiona coretamente parché l'atività cantautor no ła xe riconosua.
Se posibiłe uxa n'attività prexente inte'l elenco. Te poi propore qua 'l inserimento de n'atività che manca.

Luciano Ligabue (Correggio, 13 de marso 1960) xe un cantautor, scritor, regista e scenexator itałian.

Ligabue
Ligabue al PałaOłinpico de Torin a setenbre 2010
Ligabue al PałaOłinpico de Torin a setenbre 2010
Informasion xenerałi
Nòme vero Luciano Ligabue
Nasùo/a 13 de marso 1960, Correggio
In atività dal 1986
Xenere muxicałe Blues-Rock
Eticheta discografega
Strumento voxe, chitara
Atività prinsipałe cantautor
Discografia
Àlbun publicai 16
Studio 9
Live 4
Racolte 2
Sito web
Ligabue


Biografia[canbia | canbia sorxente]

Łe orìxene e i primi sucesi[canbia | canbia sorxente]

Nevodo de Marcello Ligabue, eroe de ła Rexistensa emiłian[2], dopo ch'el gà otegnùo el diploma de ragioneria el fa i łavori più disparà, infra i quałi queło del bracénte e del metalmecanico, quindi ragionier, condutor radiofonico, comerciante, promoter, zogador de bałon (ne łe serie inferiori) e consegièr comunal[3]; 'ntel 1986 co' dei so amighi el fonda el grupo amatatoriałe Orazero, che ciapa 'l nome da'l so brano e co'l qual dal 1987 partesipa a diversi concorsi provinciałi e nasionałi co' tòchi orixinałi cofà Sogni de Rock'n Roll, Anime in plexiglass, Sarà un bel souvenir, Bar Mario e Figlio d'un cane.

Ła prima trasa "uficiałe" de Ligabue risałe al 1988, ano de incixion co' i Orazero, de ''Anime in plexiglas/Bar Mario'', el singoło vede 'l ciaro drìo ła vitoria de un concorso musicałe provinciałe, par grupi co' baxe 'nte ła Provincia de Reggio Emilia dal nome "Terremoto Rock". El singoło in viniłe a 45 giri, publicà in poche copie, xe ancùo introvabiłe. Uno dei primi singołi stanpài porta el nome de Eroi di latta, che in faxe de produsion del primo album, Ligabue, vegnarà staformà in Balliamo sul mondo.

El vien scoverto da Pierangelo Bertoli, che include el so brano Sogni de Rock'n Roll in un so album, Tra me e me, 'ntel 1988 e ł'ano drìo ''Figlio d' un cane'' 'ntel Album Sedia Elettrica e, senpre, 'ntel 1989 ło propone al so produtor Angelo Carrara par insìder un disco, ''Ligabue'' che sarà sul mercà 'ntel magio 1990 e che orixinariamente xera intitołà "... e non è obbligatorio essere eroi"[4].Par reałixar el so primo album che vegnarà fora 'ntel Ligabue se avałe de ła cołaborasión del so novo grupo o Clan Destino, che curarà co' łu i arangiamenti dei brani e che sarà al so fiànco nei concerti e 'ntei łavori drìo in studio de registrasión. 'Ntel steso ano el cantante partesipa al Festivalbar 1990 col tòco Balliamo sul mondo, risevendo el Disco Verde, premio destinà al mejo cantante emergente de ła kermesse.

Xe del novenbre 1991 l'insìda del segondo disco, Lambrusco coltelli rose & popcorn che ripete 'l suceso de ł'album de ł'exordio, co' dei singołi cofà Libera nos a malo e Urlando contro il cielo.

'Ntel lujo del 1992 el se exibise par ła prima volta al Montreux Jazz Festival. Senpre in queł ano el taca ła so cołaborasión co' el Club Tenco par el qual el partesipa ad alcune publicasion e inside el brano Variazioni su temi tzigani in omagio al poeta e cantador ruso Vladimir Vysotskij.

Ła crixe[canbia | canbia sorxente]

El terso album, Sopravissuti e sopravviventi, ìse 'ntel 1993 e vien registrà ancora co' i Clan Destino. Sto album vol esar ła firma a ła salìa definitiva de ł'artista; se pol capirlo da ła registrasión de quałità netamente megio e da 'na maxór cura par łe cansón dal pónto de vista strumental; ma 'l disco no vien apresià, cofà i presedenti, soratuto da łe radio che trasmetarà soło ch'el singoło Ho messo via. Vien considarà un łavoro più intimista e scuro dei predecesori e łe vendite ghe ne risente. Drìoman vegnarà tanto rivałutà dai fan, ma sul momento cauxa a ł'autor un periodo critico, nel quałe el ronpe col vecio produtór e co' ła vecia band.

'Ntel 1994 el publica A che ora è la fine del mondo?, el so quarto album, che gà al so interno 8 tòchi che Ligabue definise "scagie spantegàe". Ła trasa de vertaùra xe 'na cover de It's the end of the world as we know (and I feel fine) dei R.E.M. che deventa A che ora è la fine del mondo? co' un testo che evoca el ròło asunto da ła tełevixion ne ła vita locałe de łe persone ciapando spunto da ła vitoria ełetorałe de ł'ałora prexidente de ła Fininvest, Silvio Berlusconi. Łe altre canson xe vecie B-sides, łe do version de Gringo ('91 e '94). L'han detto anche gli Stones, cantàda co' i ałora semisconosùi Negrita, e ła bałada Male non farà scrita da łu ma xa insixa dai Timoria; ghe xe po' Fuoritempo, anca staltra scrita da łu steso ma xa insixa dai Rats e 'na version live de Urlando contro il cielo. In più su sto album xe anca prexente Cerca nel cuore, scrita a 4 man co'l tastiera de ałora dei Clan Destino Gianfranco Fornaciari.

Senpre 'ntel 1994 co' Valerio Soave, el fonda ł'eticheta Mescal, che deventarà po' infra łe più ative 'ntel panorama rock itałian, produxendo i primi brani de La Crus, Massimo Volume, Modena City Ramblers e Stefano Belluzzi.

Ła consacrasion[canbia | canbia sorxente]

Ła svolta 'nte ła cariera de Luciano Ligabue riva 'ntel 1995, co'ła publicasion de Buon compleanno Elvis el disco che rendarà popołar el cantante emiłian 'ntel panorama muxical itałian. Scuaxi tuti i tòchi de sto album, che prexenta de łe sonorità un mucio visine ad un rock'n roll de stanpo 'merican, deventarà, infati clasici del so repertorio e sfondarà intra 'l publico xovanil, a partir da Vivo,morto o X e Hai un momento Dio? pasando par Leggero fin al rivar a Certe Notti, brano votà dai łetori de ła rivista muxicałe Tutto cofà "ła mejo canson dei ani novanta"[5], vinsidór inaxonta de ła Targa Tenco come mejo canson de ł'ano. El disco, considarà dai più come 'l vertice conpoxitivo de ł'artista, vendarà 1 200 000 copie, risevendo el Disco de platino europeo IFPI e vinsendo tre premi de ł'ałora Premio Italiano della musica PIM.

Ligabue durante el concerto Ellesette del 20 disenbre 2007

'Ntel 1996 el se exibise al Pavarotti & Friends co' 'na stranba versión de Certe Notti, duetando co'l parón de caxa Luciano Pavarotti.

Senpre del 1996 xe ła so segonda partesipasión al Montreux Jazz Festival, sta volta co' ł'ex Rolling Stones Mick Taylor come special guest, co' cui el fa anca alcune cover.

El momento d'oro del cantante continua 'ntel 1997 co' ła publicasion de Su e giù da un palco, dopio disco rejistrà dal vivo co' ła xonta de tre inediti : Il giorno di dolore che uno ha, Tra palco e realtà e l'Ultimo tango a Memphis, sta ultima cover de Suspicious Minds de Elvis Presley. El pregio de no esar stà ritocà in studio vien in parte conpensà negativamente dal fato de eser un collage de tochi rejistrà in vari concerti. Anca sto album sfonda el muro del miłion de copie vendùe, e xe 'l primo live itałiàn a raxonxer sto rexultàdo[6]. El 1998 el publica ła cołona sonora del so primo film da registra Radiofreccia contenente tra ł'altro Ho perso le parole, Metti in circolo il tuo amore e "Siamo in onda". El secondo CD de ł'òpara xe 'na racolta de brani forèsti inserìi 'ntel fim; xe prexenti artisti come David Bowie, Iggy Pop, Lou Reed, Lynyrd Skynyrd che raprexenta el retrotera muxicałe e ła fonte de ispirasión del cantante, co' cantadóri cofà Bob Dylan e Neil Young.

'Ntel 1999 co' Jovanotti e Piero Pelù, che gà péna mołà i Litfiba, inside Il mio nome è mai più, brano pasifista dal qual vien prodoto un singoło el cui recavàdo va in beneficensa: i tre se firma LigaJovaPelù. Publico e critica se divide intra chi che plaude ł'inisiativa e chi invese sotołinea ła retorica e'l prexunto antiamericanismo del tòco e del video xontà, che comunque ała fin rexultarà el più vendùo de ł'ano.

'Ntel steso ano vien fora el sesto disco Miss Mondo, a quatro ani de distansa da Buon Compleanno Elvis. Sto łavoro prexenta tanti spunti, a partir dai arangiamenti (par exenpio, in due canson, vien introdoti i archi), fin a rivar ai testi, che sbandona ła strutura del "raconto" e ponta diriti ała disiłuxión personałe de ł'artista, che se interoga su queo che ghe capita intorno. Anca sto album xe un suceso grasie a ł'autobiografica Una vita da mediano, a Si viene e si va ed a Almeno credo. El video de sta ultima canson riprende un sełebre mini-film de Bob-Dylan Subterranean homesick bluesrejistrà co' ła cołaborasión e ł'aparisión de nùmaroxi artisti itałiani, infra i quałi ła scritrice Fernanda Pivano.

Senre 'ntel 1999 se exibise a Dublino, davanti a un partèr internasionàl, ai MTV Europe Music Awards co' L'odore del sesso trata da Miss Mondo.

I primi ani domiłe[canbia | canbia sorxente]

Ligabue sona a ł'Arena de Verona el 25 setenbre 2008. Drìo de łù el baterista Michael Urbano

'Ntel 2000 el scrive 'na canson a quatro man co' Francesco Guccini (che, tra ł'altro gà resità in Radiofreccia. El tòco, intitołà Ho ancora la forza finise 'ntel album Stagioni de Guccini e riseve ła Targa Tenco come megio canson de ł'ano. Sto brano, su'l prinsìpio conparso soło che in version acustega su un CD par el fan club, sarà po' riciapà dal steso Ligabue, che ghe ne canbiarà alcune strofe e ło insidarà cofà brano inedito, par la rancùra Secondo Tempo 'ntel 2008.

Senpre 'ntel 2000 el vien premià co'l Tełegato cofà mejo intrèpito de ł'ano al concorso Vota la voce e riseve, inaxónta, el Premio Lunezia par ła canson L'odore del sesso.

El primo album del novo miłenio, Fuori come va? del 2002, torna a propóner un Ligabue clasego che recalca un mucio dei stereotipi muxicałi parcorsi 'ntei ani presedenti. Anca sto album otien 'na otima controłarìa par quanto riguarda łe vendite. Grasie ai singołi Tutti vogliono viaggiare in prima, Questa è la mia vita ed Eri bellissima. El "Liga" vinse el Festivalbar 2002 e fa incèta de premi (mejo artista mas-cio, mejo album e tour) a ł'edisión dei italian music awards che organixava ła FIMI.

'Ntel 2003 ese el secondo live. Giro d'Italia registrà durante 'l tour teatrałe che Ligabue gà tegnùo co' i so musicisti insieme a Mauro Pagani e al conpianto D. Rad dei Almamegretta. El disco prexenta 'na apresabiłe revixatasion semi-acustega de bona parte del repertorio de ł'artista, un mucio apresà oltra che dal publico, anca da ła critica che, in controtendensa rispeto al presedente disco, gà inpegnìo de ełogi sta insìda discografega. A ł'album, infati, xe stà atribuìo el "Premio Ciampi cofà mejo album de ł'ano. De Giro d'Italia l'è sta publegà anca 'na versión a tiradùra limità (50 000 copie più ulteriori 10 000 stanpà dopo un ano) co' un terso CD bonus, che gà, óltra a varie cansón, dei reading ed un monołogo.

El 2 łujo del 2005, Ligabue riséve ł'invito de Bob Geldof a partesipar al Live8 dove el se exibise danànsi ałe miàre de spetadóri préxenti al Sirco masimo de Roma

10 setenbre 2005: el Campovolo[canbia | canbia sorxente]

Exquisite-kfind.png Par saverghene de pì, varda ła pajina Campovolo.
Ligabue a ł'arena de Verona. Dadrìo de łù el chitarista Niccolò Bossini e 'na parte de ła łocuèstra de 70 ełementi

El 10 setenbre 2005, par sełebràr i 15 ani de atività e tornà su'l palco dopo 'na asensa durà sirca 2 ani e mexo el se exibise a ł'aeroporto "Campovolo" de Reggio Emilia danànsi a sirca 180 000 persone (165.264 spetadóri, fonte SIAE[citasion nesesaria]), record eoropeo par un concerto a pagamento de un singoło artista[7]. Su quatro difarenti palchi, el se exibise insieme ała Banda (el grupo che sona co' łù da Buon Compleanno Elvis), ai Clan Destino e co' Mauro Pagani. El show dura dobòto tre ore, anpò, a cauxa de problemi audio da łe bande de uno dei 4 palchi, un nùmaro inprecixà (ne ł'órdene de alcune miàre) de spetadóri desìde de łasàr ansitenpo el concerto. Un fià de xorni dopo l'artista remete 'na letara de scuxe ai fan atraverso el so portàłe Ligachannel.

L'otavo disco, Nome e cognome (2005), ese 'l 16 setenbre del steso ano e propone un Ligabue che nei testi va 'vanti su ła sia de "intimista" (e 'l titoło de l'albun xe da sto pónto de vista, 'na dichiarasión de intènti), mentre muxicalmente prexenta de łe sonorità un mucio visine a quełe de un rock anglosasone. Alcuni testi del disco vien prexentài durante el concerto de Campovolo, indove ła granda afluensa al publico antisipa queło che deventarà naltro suceso discografego. In sto album xe prexénti brani che xe deventài dei sucesi cofà Il giorno dei giorni, L'amore conta, Le donne lo sanno, Cosa vuoi che sia e Happy Hour (co'l quałe el Liga vinsarà anca el Festivalbar, e che vegnarà sielto da Vodafone par i spot publicitari de ł'istà drìo) el DVD che ese par ricordàr ł'evento Campovolo deventa el primo DVD muxicałe a vendare pì de 100 000 copie in Itałia.

El 2006 in tour[canbia | canbia sorxente]

El 7 febraro 2006 scominsia el so novo tour articołà in quatro parti: 'ntel mexe de febraro, el cantante emiłiàn se exibise nei club, e par ricreàr l'atmosfera dei scominsi, el se fa conpagnàr dai Clan Destino, nel mexe de marso afronta i pałaseti co' La Banda, durante l'Istà i stadi co' La Banda e i Cland Destino, par po' tornàr a otobre nei teatri co' parte de ła Banda e Mauro Pagani, e co' Giovanni Allevi cofà so ospite in alcune date. Par contàr sta esperiensa ese Nome e cognome tour 2006, un cofaneto de 5 DVD che gà al so interno la registrasión de un concerto par ogni fase del tour e ulteriori contenuti speciałi.

A marso 2006 el partesipa ała Cerimonia de Vertaùra dei IX Xoghi Paraołimpici invernałi de Torin 2006, indove el se exibise in mondovixión co' Il giorno dei giorni.

El 20 otobre 2006 vien fòra Gli ostacoli del cuore, brano scrito da Luciano espresamente par Elisa (co' ła quała el canta ne ła parte finałe) e utiłixà cofà primo singoło estràto dal Greatest Hits de ła cantante. El steso Ligabue dichararà che sta cansón gaveva pensaà de fargheła cantàr ad Elisa pròpio 'ntel muménto che ła gà scrita, sensa aver ciamà ancòra ła cantante[8]. Inaxónta Ligabue reałixa el videoclip de sta cansón 'fa regista e ghe apare anca cofà protagonista co' visin ła stesa Elisa.

A novenbre ła SIAE e ła critica ghe atribuise, par la seconda vòlta, el Premio Ciampi.

The best of Liga (El mejo del Liga)[canbia | canbia sorxente]

Ligabue durante el concerto Eliesette del 17 disenbre 2007

'Ntel setenbre 2007 Ligabue anuncia el so ritorno so'l palco nei pałaspòrt, co' 'l tour ElleSette: 7 concerti al PalaLottomatica de Roma 'ntel mexe de novenbre e altri 7 Datch Forum de Asago a Miłan 'ntel mexe de disénbre.

Oltra al tour, el 2007 vede ła publicasión, el 16 novenbre, de ła prima parte del best of Primo tempo. L'album, balsà avalìo al primo posto de łe clasifeghe[9] contien un CD co' 16 sucesi del periodo 1990-1995 più do inediti: Niente paura (resta in sima a ła clasifega airplay par tuto el so periodo de programasión) e Buonanotte all'Italia e un DVD che rancura tuti i videoclip del periodo.

'Nte 'l april del 2008 tàca el so European Tour nei club de łe maxóri sità del vecio continente che gà cofà tape Amsterdam, Madrid, Barsełona, Parixe, Anburgo, Monaco, Berlin, Zurigo e Londra, dobòto tute sold-out. In ocaxión de sto tour e del Best of el produtór Corrado Rustici decide de refàr la band sostituìndo Antonio Righetti e Roberto Pellati co' Kaveh Rastegar e Michael Urbano, richiesta un fià patìa da parte de Luciano[10]. 'Nte l'Istà 2009 ripete ł'esperiensa eoropea, co' un minór nùmaro de date, ma in spasi pì grandi, infra i quałi el prestigióxo Olympia de Parixe.

El 29 magio ese Secondo Tempo, baxà so ła produsión muxical dal 1997 al 2005. El singoło de łancio de ła racolta, Il centro del mondo, se soma ad altri do inediti: Ho ancora la forza, scrita co' Francesco Guccini 'ntel 2000 e Il mio pensiero. Anca in questo caxo insénbre ac CD xe prexénte un DVD co' i videoclip reałixà 'ntel steso periodo tenporałe.

'Nte ł'Istà 2008 Ligabue xe protagonista co'l so novo tour Elle Elle Stadi 2008 co' oto concerti in sete cità diverse d'Itałia, mentre 'nte ł'autuno del steso ano, infra setenbre e otobre, el se exibise a ł'Arena de Verona in sete dati, co' 70 ełementi de ła Łocuèstra sinfonega de ł'Arena direta dal mestro Marco Sabiu.

Dai concerti de ł'Arena xe de 2008 xe stà tirà xo un album live, Sette Notti in Arena publicà el 5 xugno 2009, cotenente un DVD co' łe riprexe video de ł'intièro concerto e un CD co'łe sołe cansón che Ligabue gà cantà conpagnà da ła łoquèstra.

Dopo el suceso de ł'ano precedente ripete ł'esperiens a ł'Arena de Verona anca 'ntel 2009; dopo un novo tour primaveriłe nei maxori club eoropei, infati, dal 19 setenbre al 4 otobre el cantante de Correggio tien 10 date ne ł'anfiteatro veronexe. Stavolta però i primi do concerti xe "Solo Rock'n Roll". So'l palco co' Ligabue ghe xe soło che ła band par un spetacoło che xe pretamente dal saòr rock e sensa "infrastruture multimediałi" e parte de ł'incàso sarà devołùo in beneficensa pa'l taramoto in Abruso: ne łe sucesive oto date (questa parte del tour se ciamarà "Sette Notti in Arena... non bastano" co' referimento al 2008) se exibirà conpagnà, come 'ntel 2008, da ła Łoquéstra de ł'Arena, direti da Marco Sabiu. In questa ocaxion Ligabue deventa el primo artista ad exibirse par diexe consecutive a ł'Arena de Verona co'l record de oltra 140 000 spetadori prexenti.

Ligabue a l'Arena de Verona co' xe drìo cantàr Piccola stella senza cielo co' ła coreografia de Elena Burani, in alto, come nei concerti de ElleSette

El 2010: Arrivederci, mostro![canbia | canbia sorxente]

A xenaro 2010 el cantante gà rivełà ai so fans de esar al lavoro par publicàr un novo album de inedite entro l'istà, e de progetàr un novo tour nei stadi. El lancio uficiàl del disco, previsto inisialmente, par el 7 magio[11], xe stà programà par l'11 magio 2010, steso xorno in cui vint'ani prima xe insìo el primo album, Ligabue[12]. El 15 april 2010 xe 'l Ligabue Day[13], ribatixà Liga Day. Oltre 100 sałe çinematografeghe in tuta Itałia gà trasmeso el concerto live de Ligabue tegnùo al Stadio Ołinpico de Roma 'ntel 2008. La vixion xe stàda antisipàda da 'na direta via satełite a schermi unifegà, ne ła quała el cantante de Correggio ghe gà regałà ai so fans 'na intervista e ł'ascolto in anteprima del novo singoło, Un colpo all'anima, in rotasión radiofonega dal giorno drìo ed estrato dal novo album Arrivederci, mostro!.

Ligabue in un'intervista spiega łe so motivasión del titoło del novo album[14]:

La covertìna del novo album riciapa ła someja de Erik Johansson Fishy Island[14][15][16].

Ligabue al PałaOłinpico de Torin a setenbre 2010

In ocaxión del so 50° conpleano, 13 marso 2010 xe stà publicà el testo de Nel tempo, anca questo brano prexénte 'ntel nòvo album.

A pòche ore da ła so usìda del primo singoło del novo album, Un colpo all'anima, xe intrà diretamente al primo posto de ła clasifega dei brani più vendùi online so iTunes[17] e gà debutà a ła prima posision de ła clasifica uficiałe singołi FIMI. El novo album xe rivà suìto in sima ałe clasifeghe dei albun ne łe boteghe e in download digitałe, e xe restà par tante setimane a cavało infra el primo e 'l secondo posto.

El 9 lujo xe partìo el novo tour "Ligabue: Stadi 2010". El tour estivo xe fenìo el 18 setenbre, dopo 'na serie de concerti al PałaOłimpico de Torin. In altri pałasport xe stà reałixà el tour invernałe a disenbre.

El 30 novenbre 2010 xe usìo al cofaneto Arrivederci, mostro! (Tutte le facce del mostro), contenente, oltre ała version orixinałe de l'albun, anca 'na edision acustega dei stesi brani e un DVD live che ripercore ła prima parte de tour, co' 'na canson par ogni sità vixità[18]. In seguito a l'insìda de ła version acustega de ł'albun e ad alcuni aceni a 'na tournée teatrałe, el 14 disenbre xe stàe rexe note łe date del novo tour: in ogni sità visità intra xenaro e marso 2011 ghe sarà uno o più concerti, ogni sera canbiando teatro.

El ritorno al Canpovoło[canbia | canbia sorxente]

Dopo i numaroxi tour dei ani precedenti, che se gaveva concluso a marso 2011 e dopo un novo Ligabue Day, el 23 marso 2011[19], Ligabue gà deciso de parteçipar a un soło concerto 'ntel resto de l'ano tornando a l'aeroporto Canpovoło de Regio Emiłia el 16 lujo, sìe ani dopo ła prima volta. El so concerto xe stà ciamà Campovolo 2.0.

In sta ocasion, l'area del concerto xe stà disposta par un nùmaro de spetadori łimità a 110000, par evitàr problemi tecnici e par rendar el fluso e' l defluso del publico pì axevołe. In sto caso xe stà istałà un soło palco, longo 80 metri che gabia 600m de schermi xiganti[20]. Gera anca disponibiłi: 'na xona indove podèr montàr su łe coltrine par la note, un enorme parchegio e un spasio lestìo postataménte par i fan: el LigaVillage[21]. Dal concerto vegnarà trato un disco, Campovolo 2.011[22], che sarà publicà el 22 novenbre 2011[22], e un film in 3d, in programasion ne łe sałe dal 7 disenbre del steso ano[22].

La setimana sucesiva al concerto de Campovolo 2.0 14 àbun incixi da Ligabue[23] xe intrài ne ła Top 100, çinque dei quałi tra i primi 15 posti[24] (record par la discografia itałiana[citasion nesesaria]). Intanto, ne ła top chart DVD, ai primi 10 posti se poxisiona 3 so DVD[23].

El 21 novenbre xe insìo in tute łe radio Ora e Allora, singoło che gà antisipà l'insìda de l'albun live Campovolo 2.011, publicà el 22 novenbre sia ne łe boteghe tradisionałi (in version 3CD) e digital store e 'l 6 disenbre in version 4 LP. El CD debuta diretamente al primo posto de ła clasifica FIMI[25] e contien tre inediti (M'abituerò, Sotto bombardamento e Ora e allora), i primi do dei quałi sonài anca a Campovolo.

Cariera sinematografega[canbia | canbia sorxente]

El esordise cofà regista 'ntel 1998 co' Radiofreccia storia lixiermente autobiografega e piena de małinconìa so l'ultimo xorno de trasmision de 'na radio privà, ła cui vita trascore a paso conpagno co' queła de un grupo de amighi. El Film vien prexentà fora concorso al Festival de Venesia, otien gran consenso de rimàrco e publico, e vinse 3 David de Donateło (el steso Ligabue cofà mejo regista exordiente, a Stefano Accorsi cofà mejo ator protagonista e infine par la mejo cołona sonora), 2 Nastri d'Arzento, un Globo d'Oro e tre Ciak d'Oro.

El bis lo concede quatro ani pì tardi co' Da zero a dieci, storia xenerasionałe su quatro amighi che se ritrova dopo vint'ani par un weekend a Rimini par far el ponto a asegnàr un vòto ałe so vite. El film, sfiorixà par seràr ła Semaine de la critique al Festival de Cannes, no scòde el suceso de publico e critica del film precendente e porta al regista soło che ła candidatura a un Nastro de Arzento.

'Ntel 2003 el vien premià co' ła Groła de Oro par la filmografia.

A inisio 2006 el otien un inportante riconosimento internasionałe par Radiofreccia: el film vien proietà nei Stadi Unìi ed intra ne l'archivio sinematografego permanente del MoMA, el Muxeo d'Arte Moderna de New York.

El 16 novenbre del 2006 el Premio Videoclip Itałian, organixà in cołaborasion co' l'Università IULM de Miłan, ghe dedica al cantador 'na intièra xornàda dal titoło Luciano Ligabue, Artista Totale:Dal videoclip al Cinema, nel corso del qual vien proietà i so film e tuta ła so videografia.

'Ntel novenbre del 2006 el dirixe anca el so primo video muxegałe: l'è quel de Gli ostacoli del cuore, canson scrita da łù par Elisa.

'Ntel 2009 el xe uno dei 5 conponenti de ła xurìa, presiedùa da Ang Lee, de ła 66° Mostra internasionałe d'arte sinematografega de Venesia che asegna el prestigioxo Łion d'oro.

'Ntel łujo del 2010, el xe infra i ospiti del Giffoni Film Festival, el festival anuałe del sinema par toxati, dove ch'el tien, danànsi a 'na giuria de teenager che riva da 43 nasion, ła sesion xornałiera de Masterclass, al termine de ła quała ghe xe conferìo el "Premio Truffaut".

Senpre 'ntel 2010, a setenbre, el torna 'nte łe sałe sinematografeghe co' el film-documentario "Niente paura - come siamo, come eravamo e le canzoni di Luciano Ligabue", direto da Piergiorgio Gay, che conta, atraverso łe so canson e i contributi de l'artista emiłiàn e łe testimonianse de volti noti, e non, e ła storia recente de l'Italia[26].

El 23 novenbre ghe xe stà consegnà al Pałaso del Quirinałe dal Prexidente de ła Republica Giorgio Napolitano, el Premio De Sica par la so atività de regista[27][28].

El 7 disenbre 2011 xe usìo ne łe sałe sinematografeghe "Campovolo 2.0 - IL FILM 3D" film xirà durante el concerto evento del 16 łujo 2011 a l'aereoporto de Campovolo a Reggio Emilia. El film ripercore non soło ła seràda concerto ma anca łe tape fondamentałi de ła vita de Luciano.

Cariera łeteraria[canbia | canbia sorxente]

El otien gran suceso de critica e publico co' ła racolta de quarantatré raconti Fuori e dentro il Borgo (1997) vinsendo tra l'altro el Premio Elsa Morante e 'l Premio Sità de Fiexołe. Ogni ano dal 1994 vien publicà altri raconti so'l diario de ła Smemoranda.

El so primo romanxo, La neve se ne frega, ariva 'ntel 2004, prexentà a Torin in ocaxion de ła Fiera Internasionałe del Libro, da Francesco Piccolo, a Roma, da Alessandro Baricco, a Miłan da Fernanda Pivano. El libro che scode un mucio de autorevołi consensi e conferma łe doti narative de l'artista emiłian, risbalsa subito in sìma a łe clasifeghe de vendita e, conplesivamente, se atesta a squaxi 200 000 copie vendùe. La neve se ne frega inaxonta vinse el Premio speciałe Fregene 2004, el Premio Fernanda Pivano e 'l Premio Giuseppe Giacosa. El 1° marso 2008, in ocaxion de ła fiera Mantova Comics, vien prexentà ła graphic novel del libro, senixà da Matteo Casali e dexegnà da Giuseppe Camuncoli.

El 28 Magio 2004 a Ligabue ghe vien asegnà ła łaurea honoris causa da l'Università de Teramo in Editoria. Comunicasion Multimediałe e Xornałismo. Par l'ocaxion el tien 'na łesion dotorałe dal titoło Il tempo dell'emozione, ne ła quała el despiega el significà ch'el atribuìse al pròpio modo de comunicàr atraverso muxica, scritura e çinema.

El 3 otobre 2006 ese Lettere d'amore nel frigo, racolta de 77 poexie scrite 'ntel 2003, co' cui Luciano serca de dar sfogonarse a queło che xe stà par lu un periodo particołàr de ła so vita sensa l'obligo de dover misiàre paròłe e muxega o de esare conprensibiłe ad ogni costo. Prexentà da l'autor in un mucio de atenei itałiani, el libro intra suìto ai primi posti ne łe clasifeghe de vendita e scòde tanti consensi sia intra el publico (alcune de ste poexie, infati, xe łete da l'autor, durante el tour teatrałe), che intra ła critica[29].

El 13 april 2012 el publica 'na nova racòlta de 13 raconti intitołà Il rumore dei baci a vuoto.

L'inpegno sociałe e połitico[canbia | canbia sorxente]

Videomesagio de Luciano Ligabue durante el V-Day a Bołogna

Da senpre de "sànca", Ligabue xe stà par qualche mexe consegier comunal pa'l PDS[3], ciapando parte soło che a sìe sentàe consegiari[30], poco prima de ciapàr in modo definitivo ła strada del suceso cofà artista. Ła so sensibiłità par i temi sociałi xe comunque ancora viva e se manifesta (oltra a łe inisiative benefiche in cui el partesipa[31]) anca a l'interno de łe so canson, dei so libri e dei so film. Merita de eser cità, a tal propoxito, i brani A che ora è la fine del mondo? del 1994 (cover de "It's the end of the world" dei R.E.M.), Buonanotte all'Italia del 2007 e Gringo (in 2 version, una del 1991 e una del 1994, brano ispirà dała figura de Ronald Reagan.

Ła so conosùa riservatesa, inaxonta, no ghe gà inpedìo de partesìpar a inisiative dal forte vałor połitico e sociałe. Se ricorda, infati, łe so partecipasion al concerto del Primo Magio 'ntel 1996 e 'ntel 2006.

'Ntel 1999 el registra el brano Il mio nome è mai più (i cui proventi xe stài destinài ad Emergency) co' Jovanotti e Piero Pelù par dar un forte segnałe pasifista in opoxision a ła decixion del governo de ciapàr parte a ła guera del Kosovo.

'Ntel lujo del 2005 el ciapa parte al Live8, organixà par sensibiłixàr i cai de goerno osidentałi so' łe tematiche che rivarda el terso mondo.

Ła canson Una vita da mediano xe stà utiłixà cofà cołona sonora par la prexentasion de ła candidatura de Romano Prodi a Prexidente del Consejo 'ntel 2006[32].

Ne l'istà del 2007, atraverso ła difuxion par 24 ore de 'na cover del brano anbientałista de Pierangelo Bertoli Eppure Sofia, dà el so apòxo morałe al Live Earth, manifestasion organixà da Al Gore par la salvaguardia de ła sałute de ła Tera (la reałixasion vegnarà po' uxà 'ntel 2008, cofà cołona sonora de un spot del Ministero de l'Anbiente).

Senpre 'ntel 2007, l'8 setenbre, el partesipa al V-Day de Beppe Grillo co' un video in cui el critica el sistema pułiitego in Itałia. In ocasion del so tour Ellesette, ne l'inverno del 2007, el partesipa al projeto [[Lifegate (ecołogia)|Inpato Xero de LifeGate permetendo ła creasion de 125.906 m2 de foresta ne ła Costa Rica[33]. Tałe inpegno par LifeGate xe rinovà ad ogni tour de l'artista, asocià, inaxonta, a ła creasion de 'na community de Car pooling che consenta de trovar dei conpagni de viagio par raxonxer la locałità del tour, riduxendo, cussì łe emision de CO2 e 'l trafego[34].

'Ntel 2008, inveçe, el tien do concerti (voxe e chitara) contro ła mafia par l'asociasion Libera de Don Luigi Ciotti.

'Ntel 2009, el insìde, co' altri so cołeghi itałiani, el ugnòło Domani 21/04.09 scrito e prodoto da Mauro Pagani, el cui recavàdo xe destinà al fondo benefico "Salviamo l'arte in Abruzzo" (Salvemo l'arte in Abruso).

El 21 Setenbre 2009 el firma l'apeło par la łibartà de stanpa in Itałia slansà, so łe pajine e so'l sito internet del quotidiano La Repubblica dai giuristi Franco Cordero, Stefano Rodotà e Gustavo Zagrebelsky, in seguito a ła citasion in gudisio del steso xornałe da parte del premier Silvio Berlusconi[35].

In ocasion de łe proteste e de łe manifestasion de l'autuno 2010, descaenàe da ła proposta de reforma del sistema scołastico e universitario del DDL Gelmini, el esprime ła pròpia sołidarietà a risercatori e studenti dichiarando che, finalmente, i xoveni gera drìo manifestàr l'angosa pa'l pròpio futuro. Da segnałàr, tra l'altro, sia un convegno a l'Università de Regio Emiłia[36], sia a Livorno, a marxene de ła proiesion del documentario Niente paura[37].

El 12 avrìl 2011 el partesipa, co' l'onorevołe Rita Borsellino, a un incontro-dibatito 'rente ła sede de Bruxelles del Parlamento eoropeo dal titoło "L'Italia che non si arrende. L'Italia che non ha paura di guardare al futuro e all'Europa" (L'Itałia che no se arende. L'Itałia che no gà paura de vardàr al futuro e a l'Eoropa).

Premi e riconosimenti[canbia | canbia sorxente]

Muxica[canbia | canbia sorxente]

Ligabue durante un concerto Solo rock'n roll a l'Arena de Verona 'ntel 2009

Note[canbia | canbia sorxente]

  1. (IT) Vitali, Aldo (26 novembre 2003). L'intervista "incriminata" TV Sorrisi e Canzoni. URL consultà el 3 aprile 2011.
  2. (IT)Giuseppina Manin. «Ligabue: divento attore per mio nonno partigiano». Corriere della Sera, RCS, 14 novembre 1997, p. 35. URL consultato in data 20 ottobre 2011.
  3. 3,0 3,1 (IT) Le Iene - Intervista: Luciano Ligabue In Le iene. Mediaset, 23 novembre 2011. URL consultà el 25 novembre 2011.
  4. dal libreto del CD, inte ła riedision 2009 publicà in edicoła dal Corriere della Sera.
  5. (IT)Ligabue:biografia. Warner Music Italy. URL consultà el 30-01-2010.
  6. (IT) Un milione di copie per "Su e giù da un palco" In Ligachannel. 29 maggio 2006. URL consultà el 30 gennaio 2010.
  7. (IT) Ligabue nel Guinness dei primati In Rockit.it. 1º settembre 2005. URL consultà el 30 gennaio 2010.
  8. (IT) Testimonianza audio-video di Ligabue su "Gli ostacoli del cuore" In Elisaweb.net. URL consultà el 30-01-2010.
  9. (IT) 31-12, singolo e album in vetta! In Ligachannel. URL consultà el 30 gennaio 2010.
  10. (IT) Soragni, Daniele (25 giugno 2008). Il mio rock che parla d'amore (intervista) TV Sorrisi e Canzoni. URL consultà el 29 giugno 2010.
  11. (IT) Il 7 maggio esce il nuovo disco di Luciano! In Ligachannel. URL consultà el 12 marzo 2010.
  12. (IT) ARRIVEDERCI, MOSTRO! In Ligachannel. URL consultà el 16 marzo 2010.
  13. (IT) Katia Riccardi. «I cinquant'anni di Ligabue e il cinema diventa rock». La Repubblica, 14 aprile 2010. URL consultato in data 29 giugno 2010.
  14. 14,0 14,1 (IT) Ligabue, con "Arrivederci, mostro!" supero le mie ossessioni . Adnkronos. URL consultà el 16 aprile 2010.
  15. (EN) fishy island by ~alltelleringet In deviantART. URL consultà el 19 aprile 2011.
  16. (IT) Ai confini della realtà In Focus.it. URL consultà el 19 ottobre 2010.
  17. (IT) "Un colpo all'anima": 1º posto! In Ligachannel. 16 aprile 2010. URL consultà el 24 novembre 2010.
  18. (IT) Dal 30/11: Arrivederci, mostro! (Tutte le facce del mostro) - cofanetto 2CD + 1DVD In Ligachannel. 19 novembre 2010. URL consultà el 24 novembre 2010.
  19. (IT) Il 23 Marzo Ligabue Day 2011 Nei Cinema Di Tutta Italia In Yahoo Notizie. 25 febbraio 2011. URL consultà el 17 aprile 2011.
  20. (IT) Tutto su Campovolo 2.0 In Ligachannel. 22 marzo 2011. URL consultà el 24 marzo 2011.
  21. (IT) Campovolo 2.0: LigaVillage In Ligachannel. 22 marzo 2011. URL consultà el 16 aprile 2011.
  22. 22,0 22,1 22,2 (IT) Campovolo 2.0: 22/11 l'album, 7/12 il film in 3D al cinema! In Ligachannel. 7 ottobre 2011. URL consultà el 7 ottobre 2011.
  23. 23,0 23,1 (IT) 14 album in classifica. Dvd "Campovolo 2005" al 2º posto! In Ligachannel.com. 29 luglio 2011. URL consultà el 27 agosto 2011.
  24. (IT) Classifica settimanale dal 18/07/2011 al 24/07/2011 - Artisti. FIMI. URL consultà el 5 agosto 2011.
  25. (IT) Musica: classifiche, Ligabue subito primo, in top 10 anche Mina e De Andre' - Adnkronos Spettacolo
  26. (IT) Venezia 2010, Ligabue parla di Niente Paura . 29 luglio 2010. URL consultà el 23 novembre 2010.
  27. (IT) Premi Vittorio de Sica 2010 . URL consultà el 21 dicembre 2010.
  28. (IT) Il Presidente Napolitano ha consegnato i Premi "Vittorio De Sica" per il Cinema e le altre Arti. 23 novembre 2010. URL consultà el 23 novembre 2010.
  29. (IT) Ascolta Luciano Ligabue che legge alcune delle poesie di "Lettere d'amore nel frigo" In Ligachannel. URL consultà el 30 gennaio 2010.
  30. (IT) Gian Antonio Stella. «Ligabue: gioco a fare la rockstar ma la mia casa è il "Bar Mario"». Corriere della Sera, 7 settembre 1998, p. 21. URL consultato in data 29 giugno 2010.
  31. (IT) Ligabue: concerto il 4 marzo a Reggio Emilia, per un centro oncoematologico In ER24. 15 febbraio 2011. URL consultà el 16 marzo 2011.
  32. (IT) Ernesto Assante. «Ligabue e l'"inno" del Professore: "Il mediano lavora per il Paese"». La Repubblica, 15 febbraio 2004, p. 21. URL consultato in data 29 giugno 2010.
  33. (IT)«Dai concerti di Ligabue un polmone verde in Costa Rica». La Stampa, 07 novembre 2007. URL consultato in data 29 giugno 2010.
  34. (IT) Ligabue - Tour Stadi 2010 - Arrivederci, CO2! Con il carpooling In Tandemobility. URL consultà el 28 giugno 2010.
  35. (IT) Luciano aderisce all'appello "Libertà di Stampa" di Repubblica In Ligachannel. URL consultà el 30 gennaio 2010.
  36. (IT) «Convegno della polizia con Visci e Ligabue - "La politica dia risposte"». Il Resto del Carlino, 29 novembre 2010. URL consultato in data 21 dicembre 2010.
  37. (IT) Fulvio Paloscia. «"Ragazzi, scendete in piazza e gridate la vostra idea di futuro"». La Repubblica, 3 dicembre 2010. URL consultato in data 21 dicembre 2010.


Voxe łigàe[canbia | canbia sorxente]

Altri progeti[canbia | canbia sorxente]


Łigamenti foresti[canbia | canbia sorxente]

Gnome-globe.svg Luciano Ligabue su DMoz (Segnala su DMoz un collegamento pertinente all'argomento Luciano Ligabue)

Video[canbia | canbia sorxente]