Jomo Kenyatta

Da Wikipedia, l'ençiclopedia libara.
Va a: navigasion, serca
Jomo Kenyatta

Jomo Kenyatta (October 20, 1894 – August 22, 1978), vero nome Kamau wa Ngengi, el xe stà on opositor de el colonialismo en Kenya, el primo Primo Ministro african e el primo presidente de el Kenya indipendente. I keniani i lo considera el Pare de la Nasion.

Primi tempi en Kenya[canbia | canbia sorxente]

Kenyatta el xe nato en tel vilagio de Ngenda, rente a Gatundu, e el xera on kikuyu. La so data de nasita no la xe sicura, visto che no ghe testimonianze scrite. Co i so genitori i xe morti, el zoino Kamau wa Ngengi el xe stà portà su da so zio Ngengi e da so nono Kũngũ wa Magana. El xe andà a scola a Kikuyu, on vilagio pena fora Nairobi. El se sa convertì al cristianesimo, cexa anglicana scosexe, el tel 1914. En tel 1920 el se sa sposà co Grace Wahu e el laoraa par el comune de Nairobi, asesorato de l’acqua. A lo steso tempo el gha scominsià a interesarse de politega e a laorar al giornal Mwigwithania, El Riconciliatore.

Periodo inglexe[canbia | canbia sorxente]

En tel 1929 el partito Kenya Central Association (Asociasion Sentrale del Kenya) el lo gha mandà a Londra par difendar i diriti de i kikuyu, che gavea perso la tera co l’arivo de i coloni inglexi. En tel 1931, durante la so seconda permanensa en Inghiltera, el sa iscrito al Colegio de i Quacheri de Birmingham. En tel 1932-33 el xe andà a Mosca par studiar economia. En tel 1934 el xe tornà a Londra par studiar al Colegio Universitario de Londra. En tel 1937 el gha finio i studi de antropologia e el gha publicà la so tesi su la cultura kikuyu (Facing Mount Kenya – Stando de fronte al monte Kenya) usando el so novo nome de Jomo Kenyatta. Par tuto stò tempo el fasea presion politega a favor de i kikuyu. En tel 1943 el gha sposà Edna Clarke e el gha avù on fiol, Peter Magana ne lo steso ano. En tel 1946, Kenyatta el gha fondà la Federasion Panafricana co el colega Kwame Nkrumah – che el diventarà el primo presidente del Ghana -, e el xe tornà en Kenya.

Politego[canbia | canbia sorxente]

Na olta en Kenya, Kenyatta el se sa sposà na terza olta co Grace Wanjiku e el gha scominsià a insegnare al Kenya Teachers College, la scola magistrale de livel uninversitario. En tel 1947 el xe diventà el presidente del partito politego Kenya Africa Union, Union Africana del Kenya. En tel 1951 el se sa sposà par la quarta olta co Ngina Muhoho, conosuda da tuti come Mama Ngina. En te l’otobre 1952 el xe stà arestà co l’acusa de esar ono de i leader de i Mau Mau. Dopo cinque mesi de proceso, el xe stà condanà a sete ani de lavori forsati e mandà a Lodwar, el te la region de el Turkana al nord de el paexe. La Kenyata no el podea parlar con nisun. L’unico che lo gha aiutà el xe stà on murator padoan, Campagnola, che ndava a parlar co lu tute le sere. Che Kenyatta el fuse veramente ono de i Mau Mau el no xe mai stà provà. El KAU el xe gha diviso en do, formando la Union Democratica Africana del Kenya e l’Union Nasional Africana del Kenya (KANU), Sto ultimo sarà el partito che governerà el paexe par 40 ani. En tel 1960 Kenyatta el xe stà eleto presidente del novo partito KANU e la so libarasion la xe stà domandà da tute le forxe politeghe del Kenya. Kenyatta el xe stà libarà en tel 1961 e ameso subito a l’asenblea legislativa. El gha subito provà a riunificar i partiti, ma sensa suceso.

En tel magio 1963, el KANU el gha vinto 83 segi su 124 e el gha formà el primo governo autonomo del Kenya. Kenyatta el xe diventà el Primo Ministro. El gha subito domandà a i bianchi de restar en Kenya anca dopo l’indipendensa. Kenyatta el xe diventà el primo Presidente del Kenya el 12 dicembre 1964.

Da presidente, Kenyatta el gha diviso el potere co i so amisi kikuyu, conosudi come la Mafia de Kiambu, e el gha diviso le tere tra de lori. La so fameja la xe diventà la pi rica dl paexe. La corusion la xe diventà el modo de governar. El gha anca fato entrar el paexe en te le Nasioni Unie e el gha scominsià el proceso d eunion co l’Uganda e la Tanzania, proceso che el no xe andà ben. La stabilità e le idee a favor de l’ocidente le gha atirà i finansiamenti, ma la represion de tute le oposisioni la gha atirà la critica de i movimente de i diriti umani. Durante i so ani de governo, i pi importanti disidenti i xe stà copà: Pio Gama Pinto, Tom Mboya, Arwings Kodhek, Roland Ngala e Josiah Mwangi Kariuki. Kenyatta el xe morto el 22 agosto 1978 a Mombasa. El so vice-presidente, Daniel Toroitich arap Moi el xe diventà el so sucesor.

Commons

So Commons ghe xè de i file multimediałi so Jomo Kenyatta