Interdental

Sto articol al è scrit in dialet belumat (bełunexe)

L' interdental, dita anca dental fricativa, l'è na consonante fata metendo la pònta de la léngua in medo i dent: a diferénža de la dental ploxiva no la blòca mìa tuta l'aria ma la la làsa pasàr. Ghen'è do tipi de interdental:

• interdental sórda, come l'inglexe thanks o al spagnol cazar
• interdental sonora, come l'inglexe the, this

Le interdentali le è fra i soni pi veči e spečiali de tùt al véneto. Anca in véneto ghen'è do tipi de interdental:

• interdental sórda del belumat ẑavata, ẑinque, naẑion , del trevixan zhavata, zhinque, nazhion e de la basa zavata, zinque, nazion che te le altre quatro province la deventa "s" (i dis: savata, sinque, nasion)
• interdental sonora del rovigot ła zente, el pianzéa che in belumat la deventa na dental -d- (la dent, al piandéa). I altri dialeti veneti i l'à canbià co na sibiłante -x- (ła xente, el pianxéa).