Giografia del Kenya

Da Wikipedia, l'ençiclopedia libara.
Va a: navigasion, serca
Mapa del Kenya

La giografia del Kenya la xe complexa. El Kenya el xe on paexe de l’Africa Orientale, el xe traversá da l’equatore ma el presenta na serie de climi che va da quasi tropicali, a quasi tenperati. La longa costa la lasa el posto a deserti e i altipiani de l’interno. Longhe cadene de montagne le traversa el paexe, che nol ga fiumi inportanti, ma el xe caraterizá da la Rift Valley. Le aque interne le presenta laghi de acqua dolse, de aqua salá e e supioni de aqua calda. Se cata anca foreste pluviali e tropicali.

La costa[canbia | canbia sorxente]

La costa del Kenya la xe longa 536 km e la xe tuta so l’Oceano Indiano. Longo la costa se cata bariere coraline – notevoli quele de Malindi, Watamu e Shimo la Tewa;, spiage sabiose – Diani Beach e a nord de Malindi; e ixole – arcipelago de Lamu e Mombasa. L’estuario del fiume Tana – l’unico fiume de na serta portata – a nord de Malindi el xe cuerto da na foresta tropicale rica de primati, speso sconosudi en tel resto del paexe. La fasia costiera la xe quasi tuta de tereni autoctoni formatisi co l’erosion de la bariera coralina pi vecia che la se sa solevá fin a formar on bastion longo la costa stesa. Da la costa, a sud, se sale rapidamente verso l’altipiano de Yatta, mentre che longo el confin co la Tanzania el teren el sale pian pianin verso el Kilimanjaro, veta pi alta de l’Africa. La costa nord la rimane de basa altitudine fin a l’interno, do la se misia co le pianure desertiche che vien da la rejon somala.

Altipiani[canbia | canbia sorxente]

Quasi tuto el Kenya meridionale el xe formá da altipiani che i va da 800 a 3000 metri, co na media sora de i 1600 m. L’altopian de Yatta el scominsia rente de la costa e el va fin a i altipiani de i kamba, par zontarse a l’altipian da doe sale el Monte Kenya. A nord del Monte Kenya, el teren sende rapidamente verso la rejon de Marsabit. Tuto el teritorio maasai – longo el confin co la Tanzania – el xe fato de altipiani comunicanti tra de lori. I pi inportanti i xe quei de Anboseli, Kaputiei, el Mara, e quei rente de la cadena de i Mau.

Rift Valley[canbia | canbia sorxente]

La Rift Valley, la Val Spacá, la xe la pi longa val del mondo (6000 km). La Rift Valley la entra en Kenya da la Tanzania e la se move a nord en do tronconi, che i se riunise prima de entrar en Etiopia. Lálteza de la base del Rift la va da 600 a 1200 m s.l.m. I costoni che i divide la vale da i altipiani i pol verghe da 200 a 1000 de altesa. La larghesa de la vale la va da 20 a 200 km. Rentro a la Rift Valley se cata i grandi laghi kenyani, quasi tutti salá o co fenomeni de acque calde. Al confin co la Tanzania se cata el Lago Magadi, sfrutá par el sal. A ovest de Nairobi se cata i laghi Elementeita, Naivasha, Nakuru, Bogoria. Quasi tuti sti laghi i ga anca na popolazion de fenicoteri - e altri osei - famoxa par la so vastitá. I sofioni de acqua calda o de vapor soto presion, i se cata longo tuta la vale. Inportanti i xe quei de Ol Karia, rente de Naivasha. El vapor el xe utilizá par la produzion de energia eletrica.

Le aque[canbia | canbia sorxente]

En Kenya no se cata fiumi inportanti. I unici do i xe el Galana e el Tana. El Galana el nase so le Coline Ngong, poco a sud de Nairobi, el scominsia come Athi (l’aqua che score), el diventa Galana – ma le xe anca conosú come el Sabaki – dop che el ga pasá i altipiani de i kanba. Pi inportanti i xe i laghi. El Kenya el controla on tochetin de Lago Vitoria, ma el ga on bon numaro de laghi longo la Rift Valley, e el Lago Turkana al nord.

Montagne e foreste[canbia | canbia sorxente]

L’elevazion pi alta el xe el Monte Kenya (5199 m). En Kenya se cata anca la fasia pedemontana del Kilimanjaro. Altri monti i xe l’Elgon (4321), condivixo co l’Uganda, la cadena de i Aberdare, e le cadene montuose de l’Elgeyo Marakwet, de i Mau, le Coline Ngong e el monte Marsabit. Na olta, el Kenya el xera cuerto de foreste en quasi tuta léstension sora i 1000 metri de altitudine. Ancó, par efeto del disboscamento e de l’agricoltura, rimase qualche foresta soltanto. La foresta dei monti Mau la xe la pi grande de l’Africa Orientale. La foresta de Kakamega la xe l’unica foresta pluviale de la region. Grandi estensioni a boschi – quasi tuti usadi a livel comerciale - se cata en tel Baringo, en tel Elgeyo Marakwet, e en tel nord est del West Pokot. Ntorno al monte Kenya ge na foresta cosí come se cata foreste en tel parco de i Aberdeare.

Area[canbia | canbia sorxente]

  • Totale: 582 650 km²
  • Tere: 569 250 km²
  • Acqua: 13 400 km²

Clima[canbia | canbia sorxente]

  • Longo la costa se cata on clima tropicale. A línterno, soto i 1000 metri ge xe on clima arido, e anca zone desertiche do no pioe mai. Sora i 1000 metri se cata climi tenperati, continentali e anca alpini.

A Nairobi la tenperatura no la sale mai sora i 27 gradi de giorno, co de le ecesioni a febraro. De note la tenperatura la va zo fin a 15 gradi, ma anca a 3-4 gradi de lulio o agosto. En te la region del Turkana, la tenperatura la va da na masima de 48 a na minima de 25 gradi.

Risorse Naturali[canbia | canbia sorxente]

  • oro, rubini, petrolio, sofioni de vapor, tereni fertili, parchi naturali richi de selvagina.

Uso de la tera[canbia | canbia sorxente]

  • Agricola: 11%
  • Pascoli: 37%
  • Foreste e boschi comerciali: 30%
  • Altri: 22%

Ecologia[canbia | canbia sorxente]

La cresita de la popolazion la ga fato cresar anca i problemi anbientali. Le zone urbane le xe inquiná. L’erosion e la desertificazion le se cata sopratuto al nord e en te le savane.