Giografia de l'Etiopia

Da Wikipedia, l'ençiclopedia libara.
Va a: navigasion, serca
Mapa de l’Ehiopia.

L’Etiopia la fa parte del Corno d’Africa. El paexe el confina co Eritrea, Gibuti, Somalia, Kenya, Sud Sudan e Sudan, e nol ga sbochi sul mar. Se se prende en consideraxion la region giografica etiopica, la confina anca col Mar Roso. La naxion Etiopia la xe caraterizada da on vasto altopian (da 1.800 a 3.000 m.) divixo da la Rift Valley. La masima elevasion la xe de 4.533 m. L’altopian l’ocupa quasi tuto el teritorio naxional, e el disende gradatamente verso el Sudan – a ovest – e la Somalia – a est. Dal Lago Tana nase el Nilo Blu chel se inesta sul Nilo Bianco a Khartoum, en Sudan. En te la region de Afar, se cata la depresion de la Dancalia (Danakil en te la lengoa locale, o anca Afar Depression en inglexe) co el ponto pi in baso a 125 m. soto el livel del mar.

Topografia[canbia | canbia sorxente]

Topografia de l’Etiopia

Tra la alta vale del Nilo e l’Eritrea, se cata on altipian co varie cadene de montagne. Quasi dapartuto, l’altipian el finise de bruto e co pareti a strapionbo. Le montagne le forma de le valate e anca dei canyon strati, co grosi fiumi zo en val. Al nord, l’altopian el va calando a forma de gradoni de piera. A Sud el forma la gran valata do se cata el Lago Turkana (chel xe en Kenya e chel xe alimentà da le acque del Fiume Omo. Al sentro de i altipiani, se catana depresion do ghe xe el Lago Tana. Da stò lago parte el Nilo Blu. L’erosion de i tanti fiumi la ga creà de le coline che le strapionba a vale anca par mile metri. Le se ciama Anba e le xe tipiche de sti altipiani. Le montagne pi alte le xe la cadena de Semien, co i pichi del Ras Dejen, 4,550 m., el Biuat e el Yared de poco pi basi del Ras Dejen. De la de la Rift Valey, de fronte al Semien, se cata la cadena de Bale co el Tullu Demtu (4307 m.), el Chilalo (4036 m.) e el Kako (3820 m.). Altre cadene de montagne le ga pichi oltre i 4000 metri.

Le acque[canbia | canbia sorxente]

El fiume Nilo el vien fora dal Lago Tana e el va verso el Sudan. En tel percoso verso Rozares (do chel entra en tel Sudan) el ciapa l’acqua de tuti i altri fiumi de l’altopian. L’altopian etiopico el xe piegà en baso verso el nord ovest, e tuta l’acqua la confluise al Nilo. I fiumi pi grandi i xe: el Tekezé (chel vol dir el Teribile), el Abay e el Sobat. El Abay el xe el corso de l’Alto Nilo e ciapa el nome de Nilo Blu co chel ciapa le acque del Tekezé. Sti tri fiumi i porta l’85% de l’acqua de i altipiani al Nilo. El resto el xe sgrondà da el Awash, chel se buta en te la Dancalia, el Giuba (Jubba) chel va en Somalia, e da l’Omo chel se buta en tel Lago Turkana. So l’altipiano, ma anca ne le tere base, se cata tanti laghi e fonti de acqua calda.

Clima[canbia | canbia sorxente]

El clima de l’Etiopia el xe vario. Al confin co la Somalia, en te la depression de la Dancalia, el clima el xe caldo e seco, co condisioni semi-desertiche. Lo steso se pol dir de la region al confin co el Kenya e el Sudan. Su i altipiani, se cata on clima fredo e tenperato. So i altipiani le tenperature medie le va da 15° a 22°, e le pol verghe carateristiche alpine. EN te le valate, però, el xe caldo e umido. La piova media la va da 750 a 1000 mm a l’ano.

Risorse naturali[canbia | canbia sorxente]

En Etiopia se cata oro, platino rame, potasa, e gas naturale. Quasi tuti i fiumi i ga on groso potensial par lo sfrutamento idroeletrico. El teren agricolo el xe tanto, ma solo che el 20% el xe sfrutà. El 15% de la tera la xe cuerta dforeste. El resto el xe usà par i pascoli. El potensial agricolo el xe imenso. Le ricorenti carestie le ga n’origine pi culturale (la majoranza de i Etiopici de i altopiani i xe copto ortodosi; i ga on regime alimentare streto. I ani che le colture le va mal, i no ga altre colture de n’altro tipo che bilancia le perdite e i se cata sensa magnare) che fisica.