Gesù

Da Wikipedia, ła ençiclopedia libara.

Scultura del Cristo crocifiso

Gesù de Nazaret, fiol de Giusepe, el xe stà un profeta e predicatore ebreo, ativo en te i ultimi ani de la so vita, verso el 28 - 30 d.C., en te la Galilea e la Palestina. I cristiani i le considera el Mesia e Fiol de Dio, Dio encarnà lu steso. Le fonti pi inportanti par conosare Gesù de Nazaret i xe i quatro vangeli (Matteo, Marco, Luca e Giovanni), che le ciexe cristiane le ga acolto en te la so Bibia. Se cata notizsie atendibili anca ne i vangeli apocrifi, en te la leteratura giudaica de i primi do secoli, e en te la leteratura patristica de i primi secoli de l’era moderna. El scritor e storico ebreo Flavio Giusepe, el ga scrito la storia del popolo ebraico verso el 93 d.C. El libro – Antichità Giudaiche – scrito en greco, el ga on pasagio che parla de Gesù conosù come el testimonium flavianum: “Ci fu verso questo tempo Gesù, uomo saggio, se pure bisogna chiamarlo uomo: era infatti autore di opere straordinarie, maestro di uomini che accolgono con piacere la verità, ed attirò a sé molti Giudei, e anche molti dei greci. Questi era il Cristo. E quando Pilato, per denunzia degli uomini notabili fra noi, lo punì di croce, non cessarono coloro che da principio lo avevano amato. Egli infatti apparve loro al terzo giorno nuovamente vivo, avendo già annunziato i divini profeti queste e migliaia d'altre meraviglie riguardo a lui. Ancor oggi non è venuta meno la tribù di quelli che, da costui, sono chiamati Cristiani”. (Flavio Giuseppe, XVIII, 63-64]]) Alcuni storici i pensa che sto pasagio el sia stà manipolà da autori cristiani, ma tuti i manoscriti che se conose i lo riporta. Al momento no se ga motivi seri de dubitar l’autenticità del libro de Flavio.

I vangeli i parla de la nasita de Gesù da Maria de Nazaret, de la so predicazsion so el Regno de i Cieli e so l’amor par Dio e par el prosimo. I parla anca de i so miracoli, de la so Pasion, morte en croce, e de la so resurezsion e asension al cielo. I altri scriti del Novo Testamento i parla de Gesù come Salvatore de l’umanità. La Cexa lo ga riconosù Fiol de Dio e seconda persona de la Trinità, vero Dio e vero omo. Par i musulmani, Gesù el xe on profeta, ma el no xe mia morto en croce. I vari grupi ebrei i ga na posizsion diversa tra de lori. Alcuni i lo considera on ciarlatan, altri on maestro de la Lege, altri i parla de lu come on profeta de Dio a tuto dirito.

[modifica] Fonti storiche

El papiro P52, scritto in greco e datato verso el 125, el xe el pi vecio manoscritto su Gesù.

Le fonti testuali che parla de Gesù le xe:

• i quatro vangeli canonici (che i fa parte de la Bibia cristiana): Mateo, Marco, Luca e Giovani. Scriti en tenpi diversi nel primo secolo, i xe rivà a la forma atuale verso la prima metà del II secolo. Alcuni ricatamenti recenti i spinzse la data de scritura endrio en tel tenpo. I parla de la vita de Gesù, de la so predicazsion, de le so opere. I vangeli i no xe libri de storia, ma libri de fede. Questo vol dir che se cata pasagi atendibili storicamente, e pasagi che i ga on intento teologico, non storico. Par esenpio, i studiosi de la Bibia i dixe che le storie de l’infanzsia le ga parti che no le xe storiche, ma che ga on intento de insegnamento. L’archeologia en Terra Santa la ga portà a la luce vari reperti che i prova la storicità de fati racontà en te i vangeli (par esenpio el Litostrato, n’area cuerta da piere che, fra tuti i scritori antichi, solo el vangelo de Giovani el cita).
• i altri scriti del Novo Testamento, i parla de Gesù come Salvatore, i riporta de i fati de la so vita, ma sopratuto i rapresenta na testimonianzsa de linterpretazsion che i primi cristiani i ga dato a Gesù e a la so opera.
• i vangeli apocrifi (che i no xe stà acetà da la Cexa come autentici). Questi i xe scriti che vol far vedar Gesù da on ponto de vista miracolistico e legendario. El valor storico de sti scriti el xe poareto, anca se i riporta fati e situazsioni vere. I xe inportanti parché i ne da n’idea de la mentalità del tenpo.
• fonti non cristiane. Le fonti non cristiane contemporanee a Gesù no le parla de lu. I primi a parlar de Gesù fora da ambienti ligà al cristianesimo i xe Flavio Giusepe, storico israelita, e Tacito, che parla de i moti giudaici a Roma ‘impulsore Cresto’. El problema de le testimonianzse direte de la vita de Gesù da parte de contenporanei le xe uguali a quele de tuti i grandi personagi de l’antichità. Ne la majoria de i casi, le fonti storiche le xe tradive o inesistenti. Per far on esenpio, nisun el discute che Omero el fuse on poeta greco e che el gabia scrito l’Odisea, ma no ghe testi che parla de lu se non dopo pi de cinque secoli da la so morte.

[modifica] Definizsioni de Gesù

El simbolo del pese. La parola "pese" en greco ἰχθύς (ichthýs) el xe l'acronimo de Ἰησοῦς Χριστός Θεοῦ Ὑιός Σωτήρ (Iēsoùs Christòs Theoù Yiòs Sōtèr), "Gesù Cristo Fiol de Dio Salvatore".

En te i libri del Novo Testamento, tuti scriti en greco, Gesù el xe ciamà co vari nomi:

• Gesù, version neolatina de l’ebraico יְהוֹשֻׁעַ (Yĕhošūa' ), che vol dir Dio el salva. El xera on nome popolar al tenpo de Gesù e el xe ndà fora moda tra i ebrei solo dopo che el cristianesimo el ga preso piè.
• "Cristo", che vol dir "unto" en greco, e corisponde al l’ebraico Mesia. I ebrei i spetava el Mesia, l’Unto da Dio, par on riscato sociale, politego, oltre che religioso.
• Signore, en greco Kyrios. El titolo greco nol xe molto inportante. Qi el xe inportante parché el rispechia el greco de la traduzsion biblica de i Setanta, do Kyrios el xe senpre usà par ciamar Dio traduzsendo el ebraico יהוה (YHWH), chel xe el nome propio de Dio. Co stà selta, i scritori del Novo Testamento i volea dir che Gesù el xe Dio.
• Fiol de l’Omo. Questa espresion la xera ebraica e riferita senpre al Mesia.
• Fiol de Dio. En tel Vecio Testamento stà espresion la xe usada par indicar na persona en comunicazsion speciale co Dio. En tel Novo Testamento se intende la filiazsion vera de Gesù.
• Re. En tel Vecio Testamento el re pi inportante el xe sta David, che dovea anca esar el avo del Mesia. El Re en asoluto el xe senpre stà Dio. Gesù el dizse che lu el xe re, ma no come i re de sto mondo, rifiutando così on ruolo politego.
• altri titoli manco usadi i xe: Rabbi (maestro), Profeta, Nazareno, Logos (Verbo), l’Emanuele (el Dio con noialtri). I nomi alegorici i xe: Agnelo, Luce, Buon Pastore, Pan, Ultimo adamo, Strada, Verità.

[modifica] Vita

Secondo i vangeli canonici, Gesù el saria nato a Betleme de Giudea, anca se la moderna critica storica e testuale la dixe che la nasita la saria stà a Nazaret e riportà come a Betleme par far vedar che le profezie del Vecio Testamento le xera direta a Gesù de Nazaret. No ghe posibilità de esar pi precisi parché i argomenti pro e contro i ga lo steso valor.

[modifica] Vangeli de l’Infanzia

Beato Angelico, Anunciazione, 1436–1445, Firenze.

Luca ne dixe che on angelo el ga anuncià a Maria che la saria diventà la mare del Signore, anca se la xera vergine. El vangel de Mateo conferma stà notizsia e precisa che Giusepe el ga anca lù visto n’angelo che lo ga spinto a sposar Maria. (cfr. Lc 1:26-38 e Mt 1:18-25). Mateo e Luca i dixe che la nasita la xe stà a Betleme. Marco e Giovani i no dixe niente. Dopo la nasita, Gesù el xe stà portà al Tenpio de Gerusaleme, cosa posibile se se parte da Nazaret che la xe a soli nove km da la cavedal israeliana. Co Gesù el xera adolesente, el xe ndà a Gerusaleme co i genitori, el xe rimasto en tel Tenpio par vari giorni a rispondar a le domande de i dotori de la Lege. La sezsion de i vangeli de l’infanzsia no la ga da esar tolta come storica. Sti capitoli de i vangeli i vol far vedar che Gesù el xera destinà a esar el Mesia fin da prima de la concezsion verginale de Maria. I elementi de storia i xe misciadi co elementi teologici – che vol spiegar la divinità de Gesù.

[modifica] Vita publica

John Everett Millais, Gesù e i genitori, 1850, Tate Gallery (Londra).

De la vita de Gesù fin a circa trent’ani de età no se sa niente. Verso i trent’ani, Gesù el s’a fato batezar da Giovani el Batista ent el fiume Giordano e el ga scominzsià la vita publica, che la xe durà circa tre ani. Da de i pasagi del vangelo se sa che el xera conosù come el carpentiere. El greco el dixe tekton che pol riferirse a vari lavori artigianali, dal marangon al murador. I artigiani al tenpo de Gesù i fazsea parte de la clase media, l’idea de Giusepe e de Gesù come pori artigiani la xe na letura fata en Eoropa che poco la ga da vedar co la verità storica.

[modifica] Fameja

Visto che i vangeli i parla de Giusepe solo che en te l’infazsia de Gesù, se pol credar chel fose za morto prima de la vita publica del fiol. Infati, se parla de Maria, la mare, e de i so fradei. I fredei de Gesù i xe intesi come cugini o parenti prosimi da alcuni. Bisogna dir che el testo evangelico el parla de fradei e de sorele, e la usa parole greche che no le podaria esare usade par cugni. I ortodoxi i dixe che se trata de fratelastri, nati da on precedente matrimonio de Giusepe prima de sposar Maria. No ghe xe documentazsion storica par di piasè. No se parla de matrimonio de Gesù, e la cosa la saria strana par el tenpo. No la xe del tuto inposibile. Al tenpo de Gesù ghe xera na comunità ebraica – i eseni – che vivea el celibato. Se sa anca de rabini – el pi famoso el xe stà Akibà - che i se ga sposà, ma i ga visù senpre lontan da la mojere, o che i no se sa sposà par niente.

[modifica] Formazsion culturale

Gesù el palaa aramaico, e forse anca on pochetin de greco (Koiné, el greco popolar parlà en tuto el Mediterneo), lengoa usada da i artigiani. El savea lezsar el ebraico, ma no se pol dire se lo savea parlare. Al tenpo de Gesù, l’ebraico el xera usà solo par la liturgia. No se sa se el xe ndà en na scola rabinica par conosar le Scriture. Da i so discorsi se vede che el conosea ben la teologia ebraica e anca la Scritura.

[modifica] Ministero

Secondo el vangelo de Luca (3:23), Gesù el ga scominzsià el so ministero a trent’ani co el batesimo penitenzsiale (teshuvà) de Giovani el Batista, en tel fiume Giordano. El gave baxe a Cafarnao, sità de la Galilea pi inportante de Nazaret. El ga ciamà dodezse apostoli, selti fra i disepoli che i lo seguia. El so ministero el xe durà da do a tri ani (Giovani el menzsiona tri Pasque, Gv2,13;2,23; Gv5,1;6,4: e Gv11,55;12,1;13,1). En sti ani de ministero, Gesù el ga girà la Palestina sopratuto longo el Lago de Genazaret, en Galilea. Gesù el ga anca visità Gerusaleme pi olte, e la Samaria, do vivea i Samaritani, ebrei sismatici. El xe anca ndà en te la Fenicia (Tiro e Sidone), e ne la Decapoli, en transgiordania. .

[modifica] Predicazsion

La predicazsion de Gesù no la ga dito niente de novo, tuto el so insegnamento el xe fondà so el Vecio Testamento. Le novità de Gesù le xe stà:

• metare al sentro de la vita de la persona el Regno de Dio, o Regno dei Cieli, che vol dir na relazion personale co Dio, e on novo modo de relazsionarse co i altri (vedi el Discorso de la Montagna, Mt 5);
• darghe valor a la lege de l’amore (ama Dio e el to prosimo), invezse che a tute le legi che se cata en te la Torah (613 legi);
• spiegar che lo Spirito de Dio nol xe sinplicemente n’emanazsion de Dio, ma Dio steso chel se fa presente en te la vita de le persone;
• anunciar che la so morte e resurezsion la gavaria dato vita a na nova era, co la vitoria finale sul mal.

[modifica] Metodologia

Rembrandt, El ritorno del fiol prodigo, 1662.

Gesù el ga insegnà sopratuto co parabole – discorsi alegorici che i rimanda a na verità superiore -, e co i iracoli – che i xe senpre el risultà de la fede (uno che ga fede el pol domanar on miracolo) e i no xe mai stà fati par fondar la fede. I miracoli i xera segni de la presenzsa de Dio, e i podea esar fati par la fede de i presenti. Le guarigioni de sabato, par esenpio, le volea insegnar el vero significato del sabato: el giorno de la piena comunion de Dio co l’omo, e dunque ci xera malà el dovea esar guarì par esar omo conpleto, e no piegà dal dolor. I miracoli so la natura, par esenpio la tenpesta sedata, i vlea dimostrar la so Signoria so tuto el creato, che Dio el xe el Signor de la Storia. Gesù el ga predicà a i ebrei, anca se in serti casi el ga parlà e fato miracoli a beneficio de stranieri – la madre fenicia, el senturion romano. Gesù el ga predicà a tuti, anca se el ga dato pi tenpo ai poareti, ai emarginati. Bisogna parò tegnar conto chel ga anca tentà de convinzsar i capi del giudaismo del so tenpo, co poca fortuna.

[modifica] Morte

Leonardo da Vinci, L'ultima cena.

La morte de Gesù la xe inportante par la fede de i cristiani. Prima de tuto bizsogna dire che Gesù nol xe morto, el xe stà copà. Pochi giorni prima de la so morte el xe entrà en Gerusaleme acolta da na fola che lo gha tratà come on re (Mt21,1-11;Mc11,1-10;Lc19,29-44;Gv12,12-15) che volea dir che i le considerava el Mesia. El ga celebrà la Pasqua co i so pi streti colaboratori. Durante sta selebrazsione, el ga dato on novo significato a la benedizson ebraica del pan e del vin (qiddush), dandoghe vita al sacramento de l’Eucarestia. Gesù el ga dito che el pan e el vin, co la comonità la pregava insieme, el diventava el so corpo e el so sangue, e che magnando e bevendo el pan e el vin i credenti i gavaria participà al mistero de salvezsa. Dopo la festa, Gesù el xe stà arestà, acusà de esare un ribele e fato copar da i romani su la croxe, s la colina del Golgota apena fora da le mura de Gerusaleme. Sepolto en tuta freta da i so disepoli, Gesù el xe risorto el terzso giorno. I disepoli che i xe ndà a la tonba par finire i riti de sepoltura, i ga catà la tonba vuda. I vangeli i raconta i ultimi gionri de la vita de Gesù co de le discrepanzse storiche. La pi inportante la xe la data de la Pasqua. Par i primi re evangelisti la Pasqua quel’ano la xera de sabato. Gesù el saria stà copà de venardi e el saria risorto la domenega. Par Giovani, la pasqua la xera el sabato. Sta diferenzsa la se pol spiegar parché al tenpo de Gesù diverse corenti del ebraismo le seguiva do difarenti calendari – quelo uficiale e quelo de i eseni -, contando i noviluni (scominzsio del mezse) en modo diverso.

[modifica] Storicità

En tel pasà, vari studiosi i ga considerà Gesù de Nazaret come na realtà storica, on mito, na favola, le opinioni le xe stà tante. Co lo svilupo de la storiografia moderna, l’indagine so Gesù la xe diventà pi sentifica. I filoni pi inportanti i xe quatro:

• i grupi cristiani fondamentalisti i sostien che i vangeli i sia on raconto storico, senzsa falsità o artifici leterari.
• la Cexa Catolica e la majoria de quele protestanti le sostien che i vangeli no i xe biografie storiche, ma raconti teologici baxadi so la storia, redati da le prime comonità cristiane par pasar la fede, senzsa preocupazsioni de i storiografi moderni de coerenzsa totale co le fonti.
• alcunin studiosi del XIX e primi ani del XX secolo i negava l’esistenzsa storica de Gesù [Vedi par esempio Volney (francese, 1757-1820), Charles-François Dupuis (francese, 1742-1809), Bruno Bauer (tedesco, 1809-1882), Arthur Drews (tedesco, 1865-1935), Prosper Alfaric (francese, 1886-1955)]. Questa corente la xe ora istinta e l’idea de la non storicità de Gesù acantonata.
• l’ultima corente esistente, ma anca quela manco sientifica, la xe quela de i revisionisti. I dixe che i vangeli i xe miti e che prima de studiar Gesù bisogna demitizare i testi.

Le do ultime corenti le se baxa so le contradizsioni storiche de i vangeli, vere o presunte. Bisogna ricordare che l’archeologia de i ultimi ani la ga dimostrà la storicità de varie aserzsioni che se cata so i vangeli e che no ga corispondenti en te la leteratura laica.

[modifica] Gesù e el Cristianesimo

[modifica] Cristologia

Par savérghene piesè, varda ła vóxe Cristologia.

La cristologia la xe lo studio teologico de Gesù. La Cristologia la studia la natura umana e la natura divina de Gesù, e la relazsion de ste nature en te la persona storica de Gesù; el significato de la morte e risurezsion de Gesù; el raporto de Gesù con Dio Padre e co lo Spirito Santo – le altre do persone de la Trinità; la diferenzsa tra el Gesù de la storia e el Cristo de la fede. La Cristologia la sa sviluà par rispondare a le teorie eretiche de vari teologi, specialmente en te i primi secoli de la storia de la Cexa. Inportanti i xe stà i concili ecumenici de Nicea (325) e de Calcedonia (451). A Nicea la Cexa la ga dito che Gesù el xe consostanzsiale (omoùsion) al Padre, e cioé che el xe Dio come el Padre. A Calcedonia la Cexa la ga dito che en Gesù ghe xe do nature – umana e divina – che le convive en te na sola persona.

[modifica] Gesù e le altre religioni

[modifica] Ebraismo

Par la majoria de i ebrei, Gesù el xera on maestro de la Lege. El grupo de i ebrei mesianici i riconose Gesù come Mesia, ma i no riconose la so divinità.

[modifica] Islam

Par i uslmani, Gesù el xera on profeta manà da Dio. El Corano el parla de la nasita verginale da Maria. Gesù el saria umano ma no divino. El ga fato i miracoli, col parmeso de Allah e el xe stà asunto en cielo senzsa morir so la croxe. So la croxe el xe morto n’altra persona che la ga tolto el so posto.

[modifica] Note

[modifica] Studi storici

• Giuseppe Barbaglio, Gesù ebreo di Galilea, EDB, 2002;
• John P. Meier, Un ebreo marginale. Ripensare il Gesù storico; vol. 1 - La radici del problema e della persona; vol. 2 - Mentore, messaggio e miracoli; vol. 3 - Compagni e antagonisti, Queriniana, Brescia, 2001, 2002, 2003.
• Gerd Theissen e Annette Merz, The Historical Jesus: A Comprehensive Guide, Fortress Press: Minneapolis, 1998. ISBN 0800631226. (trad. it. Il Gesù storico. Un manuale, Queriniana, Brescia 1999).
• Geza Vermes, Gesù l'ebreo, Borla, Roma 1983.
• Giuseppe Ricciotti, Vita di Gesù Cristo, A. Mondadori, Milano, 1941 (e successive edizioni).
• David Donnini, Cristo. Una vicenda storica da riscoprire. coop. Erre Emme Edizioni 1994, pp. 288. ISBN 8885378528.
• Ida Magli, Gesù di Nazareth, Rizzoli, Milano, 2004 (I Ed. 1987), pp. 208. ISBN 8817000736.

[modifica] Opere divulgative

• Corrado Augias, Mauro Pesce, Inchiesta su Gesù: chi era l'uomo che ha cambiato il mondo, Milano, Mondadori, 2006.

[modifica] Opere confesionali

• Giacomo Biffi, Gesù di Nazaret. Centro del cosmo e della storia, Editrice Elledici, Torino, 2000, pp. 156. ISBN 8801019424.
• Vittorio Messori, Ipotesi su Gesù, SEI, Torino 1976.
• Joseph Ratzinger, Gesù di Nazaret, Rizzoli, 2007. ISBN 9788817016599.
• Il più grande uomo che sia mai esistito, a cura della Congregazione Cristiana dei Testimoni di Geova, 1991.