Dołomiti
Da Wikipedia, ła ençiclopedia libara.
Łe Dołomiti (dite anca Munti pàłidi) i xé un gruppo montoxo de łe Alpi orientałi, en Itałia, par convenzsion dełimità a nord da ła Rienzsa e da ła Val Pustarìa, a òest dal'Ixarco e l'Àdexe co ła vałe omónema, a sud dal Brenta dal quałe se tira fora ła Cadena del Lagorai al confin co ła Val de Fièm e a est dal Piave e dal Cador. L'existenzsa de łe Dołomiti d'Oltrepiave, catà a est del fiume Piave, 'nte łe province de Bełun, Ùdine e Pordenon (e anca en parta del'Austria, en basa Carinzsia), de łe Dołomiti de Brenta, catà 'ntel Trentin osidentałe, de łe Dołomiti Picenine, enfrà Trentin e Vèneto, maca ła natura tanto convenzsionałe de sta dełimitazsion teritoriałe qua.
L'area dolomitica la se stende tra le province de Belun - in do che ghe xe la parte pi rilevante - Bolzan, Trento, Udine e Pordenon.
Le Dolomiti le tiol el so nome dal naturalista francese Dieudonné Dolomieu (1750-1801), che par primo el ga studià el particolare tipo de roccia predominante ne la regione (carbonato dopio de calcio e magnesio). La genesi de sto tipo de roccia carbonatica la scuminsia 'traverso l'acumulo de conchilie, coralli e alghe calcaree in anbiente de mar e tropicale (simile a l'atuale bariera coralina de le Bahamas, e de l'Australia oriental). In particolare, sti acumuli i ga vu luogo nel Triassico, zirca 250 milioni de anni fa (par far un confronto, el genere Homo el xe vegnù fora solo 3 milioni de anni fa), in zone con latitudine e longitudine diverse asè da l'atuale locazion de le Dolomiti, dove esistea mari caldi e poco fondi. Sul fondo dei mari se ga 'cumulà zentinari de metri de sedimento, che se ga trasformà soto el so stesso peso perdendo i fluidi interni e deentando roccia. Sucessivamente, el scontro tra la placca europea e la placca africana (orogenesi alpina) el ga fato vegner su ste rocce alzandole piessè de 3000 m desora del livel del mar.
El paesagio de desso, spigoloso e pien de dislivei, el ghe par a l’ocio del turista come un crogiolo disordinà de rocce che no gh'entra gnente con le bariere coraline. A determinar sta trasformazion xe sta: i piegamenti e le roture de le rocce longo piani de scorimento (faglie), ai cui movimenti corisponde altretanti teremoti; episodiche esplosioni vulcaniche e relativi depositi; erosioni diferenziali ligà ai agenti atmosferici e ai piani de deboleza ìnsiti ne le rocce.
L'inalzamento de le rocce dolomitiche el va vanti 'ncora desso. Uncuó le Dolomiti le mostrano el biancore dei carbonati de scogliera coralina, l'acutezza de rocce coinvolte in orogenesi recenti, le incision de potenti agenti esogeni (giazari, vento, piova, fredo-caldo…). Almanco sié parchi naturali i protege sta natura particolare e vari comitati ad hoc i xe inpegnà nel proporre le Dolomiti come Patrimonio de l'Umanità.
Nel futuro geologico le Dolomiti la ndarà vanti a crésar inglobando novi settori de rocce spinte dal scontro tra le placche europea e africana (come par la cadena himalayana); la sconparsa de sta spinta la determinarà el prevalere dei agenti esogeni tendenti a sgualivar e adolcir el paesagio montano (come capita nei Urali).
Alcune fra le località de vilegiatura pi conoseste presenti ne le valade dolomitiche le xe: Rocca Pietore ai pié de la Marmolada (ne la parte Veneta), Alleghe ne la Val Cordevole, Falcade ne la Val del Biois, Cortina d'Anpezo ne la Conca Anpezana, Ortisei ne la Val Gardena, Canazei ne la Val de Fassa, Cavalese ne la Val de Fiemme, San Martin de Castrozza nel Primiero, Arabba ne la Val de Livinallongo.
Ghe xe anca diversi pascoli in alta quota, come par esenpio l'Alpe de Siusi o i Altipiani Anpezani. Fin a 1800 m (versanti nord) o 2200 m (versanti al sol) la vegetazion la xe fata prinsipalmente da boschi conifere (abete rosso, abete bianco e pino silvestre), ne le alte quote da boschi de cirmolo e mughi.
La zima pi alta la xe la Marmolada, con 3343 m s.l.m.. La roccia la se presta ben a la pratica de l'alpinismo (roccia).
