Dirito aministrativo

El Dirito aministrativo el xe on ramo del dirito publico 'ndove łe so norme łe regoła łe atività de perseguimento dei intaresi publici de ła publica aministrasion e i raporti tra questa e i sitadini (diti privati inte ła terminołogia publicistica e aministrativistica).

Ła so genexi ła xe da cołegar al prinsipio de divixion tra i Poderi del Stato, overo al prinsipio de tripartision dei poderi elaborà da Montesquieu. El Podere Aministrativo, originariamente definìo «Executivo», el consiste inte ł'organizasion de mesi e de persone a cui a xe devołù ła funsion de catare i obietivi de intarese publico definìi da ł'ordinamento.

Ceni storeghi

Ł'espresion droit administratif e el termine fonctionnaire i xe nati par ła prima volta in Fransa par efeto de ła Rivolusion fransexe e i se ga difondesto soto el primo inpero, quando a xe sta tirà zò non soło łe istitusion połiteghe ma anca quełe aministrative de ł'Ancien régime.

Inte ła so faxe inisiałe, el dirito aministrativo el presentava i seguenti caratari:

• raforsamento del podere publico inte i confronti dei sitadini, dei tersi contraenti e dei stesi dipendenti publici;
• sotopoxision del podere publico a norme speciałi, derogatorie del dirito comune;
• sentralisasion de ł'atività aministrativa in senso tendensialmente monopołistico (a vien sopressi i poderi intermedi come el prefeto, łe corporasion, ecc.);
• anpio podere regołamentare de ł'executivo;
• separasion tra funsion aministrativa e funsion giurisdizionałe, in modo che i giudici no i posa interferire in nisuna maniera co l'attività dei organi aministrativi;
• creasion del Conseil d'Etat, come corpo aministrativo (i cui menbri i gera nominà e destituìi discresionalmente da ł'executivo) che el scriveva i testi normativi, el svolgeva atività de alta aministrasion, el decideva sui confliti de atribusion e el decideva sora łe controversie aministrative.

Partision del dirito aministrativo

El Dirito Aministrativo (come tanti altri rami del dirito) el xe conposto da:

• na parte generałe (procedimento aministrativo, enti publici, contrati, publico inpiego,ecc.) che el trata de istituti sostanziałi e el costituise ł'ojeto sentrałe dei manuałi tradisionałi;
• na parte speciałe che ła se intaresa de ła sicuresa publica, del governo del teritorio, de ł'anbiente, de łe profesion, de ł'urbanistica e ediłisia, ecc.;
• na parte pretamente procesuałe, dato che el proceso aministrativo el xe regolà da norme parsialmente divergenti da quełe de altre disipline procesuałi.

Łe fonti del dirito aministrativo

Łe fonti del dirito aministrativo łe pol esare adeguatamente rapresentà soło in ciave evołutiva, in quanto dal 1865 a oncò a ghe xe sta dei profondi mutamenti istitusionałi e ordinamentałi che i ga rivołuzionà ł'inpianto originario.
Atualmente - par el dirito aministrativo a se distingue:

• fonti ordinarie : a) fati idonei a generare el dirito secondo łe previxion de ł'ordinamento giuridico; b) fati idonei a produre efeti giuridicamente riłevanti. Ła Costitusion no ła indica cuałi che xe i fatti idonei a produre el diritto: soło inte łe prełegi a xe formułà on ełenco de łe fonti, paraltro non tasativo e quindi modificabiłe, tanto pì che el Codice del 1942 el xe adotà co lege ordinaria e el xe privo de forsa costitusionałe.
• fonti extra ordinem : norme poste da sogeti privi de potestà normativa e co modałità anomałe rispeto ałe previxion de ł'ordinamento, secondo el principio de necesità (ad es. el decreto lege).
• fonti atipiche : łe se cołoca a on łiveło intermedio tra łe fonti de grado costitusionałe e łe legi ordinarie (par es. el dirito comunitario, i referendum abrogativi e łe sentense de ła Corte costitusionałe).

I prinsìpi del dirito aministrativo

El prinsipio de łegałità

Łe prerogative che łe xe riconoseste a ł'Aministrasion łe xe circoscrite da ben precixi łìmiti, łigà, inte el sistema giuridico italian, al rispeto del prinsipio costitusionałe de łegałità, secondo el cuałe ł'Aministrasion ła pol esprimarse soło traverso ł'emanasion dei ati aministrativi previsti e tipizà da ła lege (prinsipio de tipicità) e al soło scopo de perseguire el fin indicà da ła lege (prinsipio de nominatività). Questi e altri prinsipi i xe ała base de łe cd. norme de asion, che łe disiplina ł'atività autoritativa de ł'Aministrasion: da ła violasion de tałi prinsipi e norme a deriva ła patołogia de ł'ato aministrativo, in termini de ła so nułità, inexistensa e anułabiłità.

Stretamente conesa ała disiplina de ł'atività de ł'Aministrasion publica ła xe dunque ła posibiłità de reagire giurisdisionalment contro i ati aministrativi fati in dispregio de ła lege. A tałe scopo, in Italia, a ghe xe on pleso giurisdizionale apoxito, composto dai Tribunali Aministrativi Rejonałi e dal Consiglio de Stato. A luri a xe asegnà ła funsion de anułare i ati aministrativi iłegitimi.

Altri progetti

• Wikimedia Commons

• Wikimedia Commons el detien imàjini o altri file so Dirito aministrativo