Daniel Moi

Da Wikipedia, l'ençiclopedia libara.
Va a: navigasion, serca
El presidente Moi co el presidente Bush en tel 2001.

Daniel Toroitich arap Moi (2 setembre, 1924) el xe on politego keniano. El xe stà el rapresentante parlamentare de Baringo dal 1964 e presidente del Kenya dal 1978 al 2002. Ancò el sa ritirà a vita privata ma el gha continuà a influensar la politega del paexe.

Primi tempi[canbia | canbia sorxente]

Daniel Toroitich (questo el xe so vero nome; arap vol dir fiol de, e Moi el xera el nome de so pare. Co el xe entrà en politega, i inglexi, mia boni de capir ste sotiglieze, i le ciamava Moi, che i credea esar el so cognome. Da alora tuti i lo ciama Moi) el xe nato a Kurieng’wo, en tel distreto de Baringo. El xe on kalenjin. El pare l’é morto zoino e so mare, Kimoi Chebei la gha dovù tirarlo su da sola. El zoino Daniel el gha studià a Tambach e el xe diventà on maestro. El gha insegnà dal 1946 al 1955. En tel 1955, Moi el xe stà eleto en tel Consilio Legislativo. En tel 1960 el gha fondà el Kenya African Democratic Union (KADU) – Union Democratica Africana del Kenya. Stò partito el dovea difendar i interesi de le tribù pi picenine contro i kikuyu e i luo che i dominava la sena locale. Moi el xe diventà ministro de l’educasion en tel 1960.

Vice Presidente[canbia | canbia sorxente]

Co l’indipendensa, el Presidente Kenyatta el xe riusì a convinsar Moi a unir el so partito al KANU, che controlaa el governo. En sto modo, Kenyatta podea continuar a governar e verghe anca el sostegno de le tribù pi picenine de la Rift Valley. Moi el xe stà nominà ministro de i esteri (1964) e dopo vice presidente (1967-1978). Kenyatta el volea on vice presidente che fuse on bon politego e che no podese verghe el sostegno de la majoransa, par consolidar el so poter.

Presidente[canbia | canbia sorxente]

Co el primo presidente Kenyatta el xe morto el 22 agosto 1978, Moi el xe diventà presidente. I so primi ani i xe stà importanti par el Kenya. El girava da partuto e incontrava la zente. La so popolarità la xera alta. L’elite kikuyu, e specialmente el grupo pi visin al vecio presidente – conosu come la Mafia de Kiambu – i dixea che Moi el xera ‘na nuovola pasegera’. Ma el 1 agosto 1982, le forse de l’aviasion i gha tentà de far on colpo de Stato. L’esercito fedele al presidente el xe stà bon de difendare el presidente e Moi el gha usà la situasion par far fora – politicamente – i so aversari. Moi el xe diventà on ditator. I opositori i xera copadi o torturadi ne le cele de la Nyayo House, en tel sentro de Nairobi. L’ocidente no gha mai dito niente parché el Kenya el xera l’unico Stato stabile e pro-ocidente en te la regione. Par restar al poter, el presidente Moi el gha orchestrà na campagna de terore. Soldadi de l’esercito e malviventi i copava de la zente inocente e dopo se ghe dava colpa a le tensioni tribali. I ‘scontri tribai’ del 1991, 1992, 1996 i gha portà el paexe su l’orlo de la guera sivile. Moi el xe stà costreto da la presion internasionale a aprovar el multipartitismo. El tel 1992 e 1997 el gha imbroià le elesioni e el xe rimasto al poter anca se la majoransa no lo gha votà.

Corusion[canbia | canbia sorxente]

Anca se Moi no el xe mai stà condanà, el xe stà ono de i pi coroti presidenti africani. El se sa dato mliari de etari de tera, el gha organisà frodi de milioni de euro (el Scandalo Goldenberg el gha frutà pi del 10% del Prodoto Domestico del paexe), e el gha dato la so aprovasion a i signoroti locali en cambio del sostegno politego.

Ritiro[canbia | canbia sorxente]

Le elesioni del 27 dicembre 2002 gha visto l’elesion del novo presidente Emilio Mwai Kibaki e la perdita de Uhuru Kenyatta, fiol de el primo presidente e candidato de Moi. Parò Moi el gavea perso prima de rivar a le elesioni. Lu el no podea pi presentarse, e Uhuru Kenyatta nol xera la persona pi adata a tor el so posto. A lo steso tempo, la zente la xera stufa de Moi e l’opozision la se sera unia en na coalision (NARC). El di de elesioni tuto el paexe el xera en tension. La zente la xe andà a votar e dopo la se sa serà en casa. El giorno dopo, co i risultati i mostraa la vitoria de l’oposision, tuti i xe vegnù fora par far festa. Moi el gha dovesto dare el poter al novo presidente e metarse da parte. El continua a controlar la vita del KANU grasie a i tanti contati che el gha en tuto el paexe.

Vita privada[canbia | canbia sorxente]

Moi el se sa sposà co Lena Bommet en tel 1950. El gha barufà co ela durante na serimonia publica en tel 1974 e da alora so mojer la gha visù ne la so casa rente a Eldama Ravine. Moi el ghe andava a catarla de tanto en tanto. Moi el gha oto fioi, cinque omeni e tri done, ona la xe adotada. So fiol Gideon el xe on parlamentare e ono de i pi coroti omeni politeghi del Kenya. N’altro so fiol, Jonathan el xe stà on pilota de rally, n’altro fiol, Philip, el xera on oficiale de l’esercito.