Codolà

Da Wikipedia, l'ençiclopedia libara.
Va a: navigasion, serca
Sto articol al é scrit in belumat

Al codolà o salesà al è an tipo particolar de pavimentažion fata de sass doperada te le ciusure orizontai de base.

File:Pavimento codolà.JPG
Codolà co elementi decorativi a Žessmenor (Žess)

Costružion e materjai doperadi[canbia | canbia sorxente]

Par prima roba se posta i sass controtera in modo da crear na žerta aeražion. A sto punto co la sabia se parecia na superficie o ben o mal pjana aonde scominžiar a far al codolà. Par farlo de solito se seležiona sass ruiss (o altri sass duri) pitost smussadi e co na sagoma cilindrica o piramidal. A sto punto se i posta partendo da 'n canton in modo da crear an strato spess almanco na spana. La finidura la gnen fata a slargar sabia e a fracarla polito o a serar i buss tra i sass co na stcianta de malta de calžina. Ten sta maniera i sass oltadi a ponta in do no i se sfila par colpa de 'l atrito e se gnen a costituir na pavimentažion che pì la gnen usufruida e pì la se conpata. normalmente al codolà al gnen fat solche co 'n scopo funžional, ma qualche olta i sass i gnen postadi in modo da costituir de i decori.

Inpieghi[canbia | canbia sorxente]

De solito al codolà, par al tenp e al costo de i materjai, al gnea fat te i staoi e te i porteghi, aonde che al è necessario er an žerto atrito parchè i animai no i sbrissie e che ghe n'è la esigenža de er an pavimento che al resiste par ani a la usura. Qualche olta se 'l cata par i stessi motivi anca te la pavimentažion stradal e in rari casi anca te le case, aonde che al podea costituir na alternativa a le pjere o a 'l pavimento in tera batesta.

Al falso codolà[canbia | canbia sorxente]

A 'l dì de incoi a scopo estetico ten žerti posti gnen fat de le pavimentažion che le ghe someja vagamente a 'l codolà. Se trata de an strato pitost fin de sasset tonti incalcadi te 'n betume a base de cimento Portland. Se cognoss direti al inbrojo parchè la pavimentažion la ristcia de saltar sù par colpa de 'l giaž, no la se deforma ma la se creba se ghe passa sora an peso concentrà (tipo na roda de 'n camiun), i sass i è pì pižoi e distanti, i interstiži i à an color bluastro.