Carato

Un diamante

El termene carato el xe principalmente doparà in orefisaria e medalurzia co un duplese signifegà, qual unità de mesura de la masa dei materiai preziosi, pari a 0,2 grami, opur cofà indegador de purezza de le lighe auree.

Mesure di peso

Zà da l'antighità e finamente a la Età de mezo el carato el xe stà doparà par la pesadura de quantità pitosto chiee e tutora el resta l'unità de mesura ponderal dei diamanti, de le piere preziose in zenare e de l' oro.

El carato el xe stà raportà e definio co precision solo inte el 1832 in Sudafrica, el logo de mazor produzion e esportazion de diamanti del mondo, onde che xe stà stabilio la conession col sistema metrego desemal: pesando co na balanza a brazzi compagni pì samenze de carobola e esivendo 'po la media aritmetega dei valori otegnui xe derivà un valore pari a circa 0,2 grami. Sucessivamente la quarta Conférence générale des poids et mesures del 1907 la ga adotà cofà valore del carato (dito carato metrego) el peso esato de 0,2 grami.

Mesura de purezza

Par quelo che rivarda le lighe de oro el termene carato el assume na acezione difarente da l'unità de mesura ponderal propia de le zeme e de le perle, mudandosi inte el stàndar proporzional de mesura de la "purezza" che el quantifega le parte de oro inte na liga su base 24/24. Inte el caso de le lighe de oro donca un "carato" el equival a na parte de oro su un total de 24 parte de medalo costituente la liga. ghe ne deriva, par esempio, che la disedura 18 carati la indega che la liga la xe costituia da 18 parte de oro fin e 6 parte de altri medai e el vien inbrevià co le sigle ct o kt o prevalentemente con la sola k de frecuente fiancada al numaro senza alcun spazio intermedio, par esempio 18k. L'oro de massima purezza el xe donca a 24 carati (24 parte de oro "fin" su 24 totai) e si lo indega co la sigla 24k.

Orizene del nome

La parola la riva da l'arabo qīrāṭ (قيراط "vintiquatresema parte"), a so volta rivante dal grego kerátion (κεράτιον, demenutivo de keras (κέρας) o sia "corno"), (siliqua del caroboler), che le samenze le gavaria un peso estremamente uniforme, de circa 1/5 de gramo.

Controło de autorità	LCCN (EN) sh85020060