Bacałà a ła Vixentina

Da Wikipedia, l'ençiclopedia libara.
Va a: navigasion, serca
Bacalà a ła vixentina esposto in te ła vetrina de na gastronomia, insieme co' altre speciałità locałi.

El bacałà ała vixentina el xe el piato "nasional" de Vicensa.

Tanto par scominsiàr, nol xe el baccalà taliàn, che el xe el pesse Gadus morhua soto sałe, ma el stesso pesse sicà al vento: un stocafisso. La tradixion ła vol che nel 1432 el capitan venexian Piero Querini el gabia fato naufragio su l'isola de Rost, in te le Lofoten, in Norvegia. Da lì el g'avaria portà xo in Veneto sto stocafisso, che xera, tra l'altro, un magnàr economego, pien de proteine e che se podeva conservàr par tanto tempo. Intanto che a Venexia el bacałà el vegnea fato mantecà (ała venexiana), a Vicensa vegnea inventà ła riceta ała vixentina. E naturalmente ghe 'ndava tacà na beła porsiòn de połenta.

Come el se fa[canbia | canbia sorxente]

Ła riceta de ła Venerabile Confraternita del Bacałà ała Visentina, par 12 persone, la vol: 1 kg de stocafisso seco (che vien dal todesco 'stockfisch' = pesse baston), 500 g de séole, 1 l de ojo de oliva estra vergine, 3-4 aciughe, 1/2 litro de late fresco, poca farina bianca, 50 g de formajo grana gratà, un ciufo de parsémoło trità, sale e pevare.

Bisogna molar el stocafisso, dopo averlo batù ben, in aqua freda, cambiandoła ogni 4 ore, par 2-3 dì. Cavar parte deła pełe, vèrsar el pesse par lungo, cavarghe ła resca e tute le spine. Tajarlo a tochi quadri, pi che se pol gualivi. Tajar fine le séole, rosołarle in na tecia co 'n goto de ojo, xontar le aciughe disavìe, sensa resche e tajà a tochi; par ultimo, stuà el fogo, metarghe el parsémolo trità. Infarinàr i tochi de stocafisso, versarghe sora el desfrito preparà e dopo metarli uno tacà l'altro in na tecia de aluminio o na pirofila (sul fondo bisogna prima metarghe raquanti cuciari de desfrito). Coverser el pesse col resto del desfrito, metendoghe anca el late, el grana gratà, el sale e el pevare. Metare l'ojo fin a coverser tuti i tochi, livełandołi. Cusinàr a fogo lento par 4 ore e mesa, movendo ogni tanto la tecia in senso orario, sensa mai mescolar (a Vicensa, se dixe pipare). Servir caldo coła połenta, ma el xe tanto bon anca dopo 12-24 ore. I vini che ghe va ben insieme i xe el vespaiolo de Breganse o el tocai roso dei Cołi Berici.

Ligadure forèste[canbia | canbia sorxente]